വാട്ട്‌സ്ആപ്പിന് പൂട്ടിട്ട് റഷ്യ; ‘മാക്സി’നെ പ്രൊത്സാഹിപ്പിക്കാൻ മെറ്റയ്ക്ക് സമ്പൂർണ്ണ നിരോധനം

റഷ്യൻ നിയമങ്ങൾ പാലിക്കുന്നതിൽ മെറ്റ പരാജയപ്പെട്ടുവെന്ന് ആരോപിച്ചുകൊണ്ട്, ജനപ്രിയ മെസേജിംഗ് പ്ലാറ്റ്‌ഫോമായ വാട്ട്‌സ്ആപ്പിന് റഷ്യയിൽ പൂർണ്ണ നിരോധനം ഏർപ്പെടുത്തി. രാജ്യത്തിന്റെ പരമാധികാര ആശയവിനിമയ സംവിധാനം ശക്തിപ്പെടുത്തുന്നതിന്റെ ഭാഗമായി ‘മാക്സ്’ (MAX) എന്ന പേരിൽ തദ്ദേശീയമായി വികസിപ്പിച്ച സന്ദേശവാഹകനെ പ്രോത്സാഹിപ്പിക്കാനാണ് ക്രെംലിൻ ഈ കടുത്ത നീക്കം നടത്തിയത്.

 മെറ്റയുടെ നിലപാടുകൾ റഷ്യൻ നിയമവ്യവസ്ഥയ്ക്ക് വിരുദ്ധമാണെന്നും പൗരന്മാർ സുരക്ഷിതവും എളുപ്പമുള്ളതുമായ ബദലായ മാക്സിലേക്ക് മാറണമെന്നും ക്രെംലിൻ വക്താവ് ദിമിത്രി പെസ്കോവ് ഔദ്യോഗികമായി സ്ഥിരീകരിച്ചു. എന്നാൽ, പുതിയ പ്ലാറ്റ്‌ഫോം സർക്കാർ സംവിധാനങ്ങളുമായി ബന്ധിപ്പിച്ചിട്ടുള്ള ഒരു നിരീക്ഷണ ഉപാധിയാണെന്ന് വിമർശകർ ആരോപിക്കുന്നുണ്ടെങ്കിലും സേവനങ്ങൾ ലളിതമാക്കാനുള്ള സംവിധാനം മാത്രമാണിതെന്നാണ് ഔദ്യോഗിക വിശദീകരണം.

കഴിഞ്ഞ ആറ് മാസമായി വാട്ട്‌സ്ആപ്പിന് മേൽ റഷ്യ ഏർപ്പെടുത്തിയിരുന്ന നിയന്ത്രണങ്ങളാണ് ഇപ്പോൾ പൂർണ്ണ നിരോധനത്തിലേക്ക് എത്തിയത്. റഷ്യൻ ഡൊമെയ്ൻ നാമ രജിസ്റ്ററിൽ നിന്ന് വാട്ട്‌സ്ആപ്പുമായി ബന്ധപ്പെട്ട വിവരങ്ങൾ നീക്കം ചെയ്തതോടെ സാധാരണ നിലയിൽ ആപ്പ് പ്രവർത്തിക്കാത്ത സാഹചര്യമാണുള്ളത്.

ഇതോടെ പത്ത് കോടിയിലധികം വരുന്ന ഉപയോക്താക്കൾക്ക് ഇനി വിപിഎൻ (VPN) സഹായത്തോടെ മാത്രമേ വാട്ട്‌സ്ആപ്പ് ആക്സസ് ചെയ്യാൻ സാധിക്കൂ. സർക്കാരിന്റെ ഈ നടപടി ആളുകളുടെ സുരക്ഷിതമായ ആശയവിനിമയ സാധ്യതകളെ തകർക്കുമെന്നും അവരെ നിരീക്ഷണ ആപ്പുകളിലേക്ക് തള്ളിവിടാനുള്ള നീക്കമാണെന്നും മെറ്റ പ്രതികരിച്ചു. തീവ്രവാദ പ്രവർത്തനങ്ങൾക്കും വഞ്ചനകൾക്കും പ്ലാറ്റ്‌ഫോം ഉപയോഗിക്കപ്പെടുന്നുവെന്നും നിയമപാലകരുമായി വിവരങ്ങൾ പങ്കുവെക്കാൻ കമ്പനി തയ്യാറാകുന്നില്ലെന്നുമാണ് റഷ്യൻ റെഗുലേറ്ററായ റോസ്‌കോംനാഡ്‌സർ ഉയർത്തുന്ന പ്രധാന ആരോപണം.

നേരത്തെ തന്നെ മെറ്റയെ ഒരു തീവ്രവാദ സംഘടനയായി പ്രഖ്യാപിച്ച റഷ്യ, നിരോധിച്ച ഉള്ളടക്കങ്ങൾ നീക്കം ചെയ്യാത്തതിന് കമ്പനിക്ക് വൻതുക പിഴ ചുമത്തിയിരുന്നു. റഷ്യയിൽ പ്രാദേശിക ഓഫീസ് തുറക്കണമെന്ന നിർദ്ദേശം മെറ്റ അവഗണിച്ചതും നിലവിലെ പ്രത്യാഘാതങ്ങൾക്ക് കാരണമായി. നിരോധനം നിലവിൽ വന്നതോടെ ഭൂരിഭാഗം ഉപയോക്താക്കളും ടെലിഗ്രാം പോലുള്ള മറ്റ് ആപ്പുകളിലേക്കോ അല്ലെങ്കിൽ വിപിഎൻ വഴിയുള്ള ഉപയോഗത്തിലേക്കോ മാറിക്കൊണ്ടിരിക്കുകയാണ്. വിദേശ സാങ്കേതിക കമ്പനികൾക്ക് റഷ്യൻ നിയമങ്ങൾക്ക് വഴങ്ങുകയോ അല്ലെങ്കിൽ വിപണി വിടുകയോ ചെയ്യേണ്ടി വരുമെന്ന കർശനമായ സന്ദേശമാണ് മോസ്കോ ഈ നീക്കത്തിലൂടെ നൽകുന്നത്.