സാംസങ് തങ്ങളുടെ ജനപ്രിയ മോഡലായ ഗാലക്സി എം17-ന്റെ ബജറ്റ് ഫ്രണ്ട്ലി പതിപ്പായ ഗാലക്സി എം17ഇ 5ജി (Samsung Galaxy M17e 5G) ഇന്ത്യൻ വിപണിയിൽ അവതരിപ്പിച്ചു.
കുറഞ്ഞ വിലയിൽ മികച്ച 5ജി സൗകര്യങ്ങളും ദൈർഘ്യമേറിയ വീഡിയോ പ്ലേബാക്കും വാഗ്ദാനം ചെയ്യുന്ന ഈ ഫോൺ, വിദ്യാർത്ഥികൾക്കും സാധാരണക്കാർക്കും ഏറെ അനുയോജ്യമായ രീതിയിലാണ് രൂപകൽപ്പന ചെയ്തിരിക്കുന്നത്.
120 ഹെർട്സ് റിഫ്രഷ് റേറ്റും 800 നിറ്റ്സ് ബ്രൈറ്റ്നസുമുള്ള 6.7 ഇഞ്ച് ഫുൾ എച്ച്ഡി പ്ലസ് ഡിസ്പ്ലേയാണ് ഈ സ്മാർട്ട്ഫോണിന്റെ പ്രധാന ആകർഷണം.
മീഡിയടെക് ഡൈമൻസിറ്റി 6300 ചിപ്സെറ്റിൽ പ്രവർത്തിക്കുന്ന ഫോണിൽ ആൻഡ്രോയിഡ് 16 അടിസ്ഥാനമാക്കിയുള്ള വൺയുഐ 8 ആണ് ഓപ്പറേറ്റിംഗ് സിസ്റ്റമായി നൽകിയിരിക്കുന്നത്.
4 ജിബി മുതൽ 8 ജിബി വരെയുള്ള റാം ഓപ്ഷനുകളിലും 128 ജിബി സ്റ്റോറേജിലും ഫോൺ ലഭ്യമാണ്.
ക്യാമറ വിഭാഗത്തിൽ 50 മെഗാപിക്സലിന്റെ പ്രധാന റിയർ ക്യാമറയും 8 മെഗാപിക്സലിന്റെ സെൽഫി ക്യാമറയുമാണ് സാംസങ് ഉൾപ്പെടുത്തിയിരിക്കുന്നത്.
ദീർഘനേരം ചാർജ് നിൽക്കുന്ന 6,000 എംഎഎച്ച് ബാറ്ററിയും 25 വാട്സ് ഫാസ്റ്റ് ചാർജിംഗ് പിന്തുണയും ഈ ഫോണിന്റെ പ്രത്യേകതയാണ്. പൊടിയിൽ നിന്നും വെള്ളത്തിൽ നിന്നുമുള്ള സംരക്ഷണത്തിനായി ഐപി54 റേറ്റിംഗും സുരക്ഷയ്ക്കായി സൈഡ് മൗണ്ടഡ് ഫിംഗർപ്രിന്റ് സെൻസറും ഫോണിലുണ്ട്.
രണ്ട് ആകർഷകമായ നിറങ്ങളിൽ എത്തുന്ന ഗാലക്സി എം17ഇ 5ജിയുടെ അടിസ്ഥാന വേരിയന്റിന് 12,999 രൂപയാണ് വില നിശ്ചയിച്ചിരിക്കുന്നത്. ആമസോൺ ഇന്ത്യ വഴി ലഭ്യമാകുന്ന ഫോണിന് ആദ്യകാല ഉപഭോക്താക്കൾക്കായി 1,250 രൂപയുടെ പ്രത്യേക ഡിസ്കൗണ്ടും സാംസങ് പ്രഖ്യാപിച്ചിട്ടുണ്ട്.
