സംസ്ഥാനത്തെ മന്ത്രിമാരുടെയും എം.എൽ.എമാരുടെയും ശമ്പള പരിഷ്കരണ ബില്ലും എം.എൽ.എമാരുടെ പെൻഷൻ വർധന ബില്ലും നിയമസഭ പാസാക്കി. പ്രതിപക്ഷത്തിന്റെ എതിർപ്പുകളില്ലാതെയാണ് ബില്ലുകൾ സഭ കടന്നത്. ബില്ലുകൾ പാസാക്കിയതിന് പിന്നാലെ നിയമസഭ അനിശ്ചിതകാലത്തേക്ക് പിരിഞ്ഞു. എം.എൽ.എമാരുടെയും മന്ത്രിമാരുടെയും അലവൻസുകൾ അവസാനമായി പരിഷ്കരിച്ചത് 2018-ലാണെന്നും സഭാ അംഗങ്ങൾ എന്ന നിലയിൽ സ്വന്തം സാമ്പത്തിക പ്രതിസന്ധികളെക്കുറിച്ച് തുറന്നുപറയാൻ എം.എൽ.എമാർക്ക് ബുദ്ധിമുട്ടുണ്ടായിരുന്നുവെന്നും സ്പീക്കർ തിരുവഞ്ചൂർ രാധാകൃഷ്ണൻ പറഞ്ഞു. പലരും വ്യക്തിപരമായി വിഷമങ്ങൾ പങ്കുവെച്ചിട്ടുണ്ടെന്ന് വ്യക്തമാക്കിയ സ്പീക്കർ, ബിൽ കൊണ്ടുവന്നതിന് സർക്കാരിനെ അനുമോദിക്കുകയും എം.എൽ.എമാർക്ക് ഒരു പി.എയെക്കൂടി അനുവദിക്കണമെന്ന് ആവശ്യപ്പെടുകയും ചെയ്തു. ഇത് പരിഗണിക്കാമെന്ന് മുഖ്യമന്ത്രി സഭയിൽ മറുപടി നൽകി.
എം.എൽ.എമാരുടെ ശമ്പളം 70,000 രൂപയിൽ നിന്ന് 98,000 രൂപയായും മന്ത്രിമാരുടേത് ഒരു ലക്ഷത്തിൽ നിന്ന് 1,33,000 രൂപയായും ഉയർത്താൻ കഴിഞ്ഞ ദിവസം ചേർന്ന മന്ത്രിസഭായോഗം തീരുമാനിച്ചിരുന്നു. 2022-ൽ ശമ്പള പരിഷ്കരണത്തിന് ശുപാർശ ലഭിച്ചിരുന്നെങ്കിലും സംസ്ഥാനത്തെ സാമ്പത്തിക പ്രതിസന്ധി കാരണം നടപ്പിലാക്കാതെ മാറ്റിവെക്കുകയായിരുന്നു. എന്നാൽ നിലവിൽ ഭരണ-പ്രതിപക്ഷാംഗങ്ങൾ ഒറ്റക്കെട്ടായി ആവശ്യപ്പെട്ട സാഹചര്യത്തിലാണ് സർക്കാർ വേഗത്തിൽ നടപടികളിലേക്ക് കടന്നത്. മണ്ഡല, ടെലിഫോൺ, യാത്രാ അലവൻസുകൾ അടക്കം നിലവിൽ ലഭിക്കുന്ന തുകയിലാണ് ഈ വർധനവ് പ്രാബല്യത്തിൽ വരുന്നത്.
