ആറ്റംബോംബ് ഊർജ്ജം ഉൽപാദിപ്പിക്കാനും ലോകത്തെ നശിപ്പിക്കാനും ഉപയോഗിക്കാവുന്നതുപോലെ ഒന്നാണ് ഇന്റർനെറ്റെന്ന് നടൻ മമ്മൂട്ടി അഭിപ്രായപ്പെട്ടു. സൈബർ കുറ്റകൃത്യങ്ങളെ സൈബർ സുരക്ഷ കൊണ്ട് പ്രതിരോധിക്കണമെന്നും ഇവയ്‌ക്കെതിരെ ജാഗ്രത പുലർത്താൻ സാമാന്യ വിദ്യാഭ്യാസം മാത്രം പോരാത്തതിനാൽ ഓരോരുത്തരും സ്വന്തം ക്ലിക്കിന്റെ ക്യാപ്റ്റൻമാരാകണമെന്നും അദ്ദേഹം ആഹ്വാനം ചെയ്തു. സൈബർ ലോകത്ത് മുഖമുള്ളവരും ഇല്ലാത്തതുമായ നിരവധി പേർ ഒളിയമ്പെയ്യുന്നുണ്ടെന്നും ഇവരെ തിരിച്ചറിഞ്ഞ് സുരക്ഷിതമായ ഒരു സൈബർ ലോകം കെട്ടിപ്പടുക്കണമെന്നും അദ്ദേഹം വ്യക്തമാക്കി. സംസ്ഥാന പോലീസിന്റെ പുതിയ സൈബർ സുരക്ഷാ പദ്ധതിയായ ‘ക്ലിക്’ (CLICK)-ന്റെ സംസ്ഥാനതല ഉദ്ഘാടന ചടങ്ങിൽ സംസാരിക്കുകയായിരുന്നു അദ്ദേഹം.
ചടങ്ങിൽ ആഭ്യന്തരമന്ത്രി രമേശ് ചെന്നിത്തല പദ്ധതിയുടെ ഉദ്ഘാടനം നിർവഹിക്കുകയും മമ്മൂട്ടിയെ ‘ക്ലിക്’ പദ്ധതിയുടെ ക്യാപ്റ്റനായി പ്രഖ്യാപിക്കുകയും ചെയ്തു. മമ്മൂട്ടിക്കെതിരെ നടക്കുന്ന സൈബർ ആക്രമണങ്ങളെ രമേശ് ചെന്നിത്തല ശക്തമായി വിമർശിച്ചു. കഴിഞ്ഞ വർഷം മാത്രം സംസ്ഥാനത്ത് 54,000 സൈബർ കുറ്റകൃത്യങ്ങൾ പോലീസ് രജിസ്റ്റർ ചെയ്തിട്ടുണ്ടെന്ന് അറിയിച്ച മന്ത്രി, ഇതിന്റെ ഭാഗമായി 250-ഓളം എഞ്ചിനീയറിംഗ് കോളേജുകളിൽ സൈബർ സുരക്ഷാ കേന്ദ്രങ്ങൾ ആരംഭിക്കുമെന്നും വ്യക്തമാക്കി. സൈബർ സുരക്ഷയ്ക്കായി ശക്തവും വ്യത്യസ്തവുമായ പാസ്‌വേർഡുകൾ ഉപയോഗിക്കുക, ടു-സ്റ്റെപ് വെരിഫിക്കേഷൻ ഏർപ്പെടുത്തുക, സോഫ്റ്റ്‌വെയറുകൾ അപ്‌ഡേറ്റ് ചെയ്യുക, ക്ലിക്ക് ചെയ്യുന്നതിന് മുൻപ് ശ്രദ്ധിക്കുക, തട്ടിപ്പിനിരയായാൽ ഉടൻ പരാതി നൽകുക എന്നീ അഞ്ച് കാര്യങ്ങൾ പാലിക്കണമെന്ന് അദ്ദേഹം ഓർമ്മിപ്പിച്ചു. കൂടാതെ, നവംബർ മൂന്നു മുതൽ ആഭ്യന്തരമന്ത്രിയുടെ ഓഫീസ് പൂർണ്ണമായും ഡിജിറ്റലൈസ് ചെയ്യുമെന്നും മന്ത്രി പ്രഖ്യാപിച്ചു.
