ലോസ് ആഞ്ചൽസ്: ഫിഫ ലോകകപ്പ് ക്വാർട്ടർ ഫൈനലിൽ ബെൽജിയത്തെ ഒന്നിനെതിരെ രണ്ട് ഗോളുകൾക്ക് തകർത്ത് സ്പെയിൻ സെമി ഫൈനലിലേക്ക് മുന്നേറിയതിന് പിന്നാലെ, എതിരാളികളായ ഫ്രാൻസിന് ശക്തമായ മുന്നറിയിപ്പുമായി സ്പാനിഷ് യുവതാരം ലമീൻ യമാൽ. ഈ ലോകകപ്പിൽ ഫ്രാൻസിന് ആകെ ഭയപ്പെടാൻ എന്തെങ്കിലുമുണ്ടെങ്കിൽ അത് സ്പെയിനെ മാത്രമാണെന്ന് യമാൽ തുറന്നടിച്ചു. ബെൽജിയത്തിനെതിരായ ആവേശപ്പോരാട്ടത്തിൽ വീണ്ടും ‘പ്ലെയർ ഓഫ് ദി മാച്ച്’ പുരസ്കാരം സ്വന്തമാക്കിയ ശേഷമായിരുന്നു ഫ്രഞ്ച് പടയെ വെല്ലുവിളിച്ചുകൊണ്ടുള്ള സ്പാനിഷ് സ്ട്രൈക്കറുടെ പ്രതികരണം. ടൂർണമെന്റ് ആരംഭിച്ചപ്പോൾ തന്നെ ഫുട്ബോൾ ലോകം ഒന്നടങ്കം കാത്തിരുന്ന പോരാട്ടമാണിതെന്നും തങ്ങൾക്ക് ആരെയും ഭയമില്ലെന്നും താരം വ്യക്തമാക്കി.
കഴിഞ്ഞ യൂറോ കപ്പിലെ ചരിത്രപരമായ വിജയങ്ങൾ ഓർമ്മിപ്പിച്ചുകൊണ്ടായിരുന്നു യമാലിന്റെ വാക്കുകൾ. മുൻപ് ഫ്രാൻസിനെ പ്രധാന ടൂർണമെന്റിൽ നിന്ന് പുറത്താക്കിയത് സ്പെയിനാണെന്നും അവസാനമായി കളിച്ച രണ്ട് മത്സരങ്ങളിലും അവരെ തോൽപ്പിക്കാൻ തങ്ങൾക്ക് കഴിഞ്ഞിട്ടുണ്ടെന്നും താരം ചൂണ്ടിക്കാട്ടി. അതുകൊണ്ടുതന്നെ അവർ സ്പെയിനെയാണ് ഭയപ്പെടേണ്ടതെന്നും ഈ ലോകകപ്പിലെ ഏറ്റവും മികച്ച രണ്ട് ടീമുകളാണ് നേർക്കുനേർ വരുന്നതെന്നും യമാൽ കൂട്ടിച്ചേർത്തു. ഫുട്ബോൾ ആരാധകർ ആവേശത്തോടെ കാത്തിരിക്കുന്ന ഫ്രാൻസ് – സ്പെയിൻ സെമി ഫൈനൽ പോരാട്ടം ജൂലൈ 14-ന് ഡാളസിലാണ് നടക്കുന്നത്
