നന്ദിഗ്രാം എക്സ്പ്രസ് ട്രെയിനിലെ ഫസ്റ്റ് എസി ക്യാബിൻ ദമ്പതികൾക്കായി മണിയറ പോലെ അലങ്കരിച്ച സംഭവത്തിൽ കടുത്ത നടപടിയുമായി ഇന്ത്യൻ റെയിൽവേ. കൃത്യവിലോപം ചൂണ്ടിക്കാട്ടി ട്രെയിനിലെ ടിക്കറ്റ് എക്സാമിനറെ (ടി.ടി.ഇ) റെയിൽവേ അധികൃതർ സസ്പെൻഡ് ചെയ്തു. ജൂലൈ 6-ന് ട്രെയിൻ നമ്പർ 11002 നന്ദിഗ്രാം എക്സ്പ്രസിലാണ് റെയിൽവേ സുരക്ഷയെപ്പോലും ചോദ്യം ചെയ്യുന്ന തരത്തിലുള്ള ഈ വിചിത്ര സംഭവം അരങ്ങേറിയത്. ഫസ്റ്റ് എസി കമ്പാർട്ട്മെന്റ് ബലൂണുകളും പൂക്കളും ഉപയോഗിച്ച് വൻതോതിൽ അലങ്കരിച്ചതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയും വൈറലാകുകയും ചെയ്തതോടെയാണ് സംഭവം റെയിൽവേ മന്ത്രാലയത്തിന്റെ ശ്രദ്ധയിൽപ്പെടുന്നത്. കോച്ചിൽ ഇത്തരമൊരു പ്രവൃത്തി നടന്നതിൽ ഉദ്യോഗസ്ഥർക്ക് ഗുരുതര വീഴ്ച സംഭവിച്ചതായി റെയിൽവേ കണ്ടെത്തിയിട്ടുണ്ട്.
റെയിൽവേ മന്ത്രാലയം നൽകുന്ന വിവരമനുസരിച്ച്, ട്രെയിൻ യാത്രക്കാരായ ദമ്പതികൾ തങ്ങളുടെ ഫസ്റ്റ് എസി ക്യാബിൻ അലങ്കരിക്കുന്നതിനായി ഒരു ഓൺലൈൻ പോർട്ടൽ വഴി സ്വകാര്യ ഡെക്കറേറ്ററെ ചുമതലപ്പെടുത്തുകയായിരുന്നു. തുടർന്ന് റെയിൽവേയുടെ യാതൊരുവിധ ഔദ്യോഗിക അനുമതിയുമില്ലാതെയും ടിക്കറ്റ് എടുക്കാതെയുമാണ് ഈ ഡെക്കറേറ്റർ ട്രെയിനിനുള്ളിൽ പ്രവേശിച്ച് കമ്പാർട്ട്മെന്റ് പൂർണ്ണമായി രൂപമാറ്റം വരുത്തിയത്. അതീവ സുരക്ഷയുള്ള എസി കോച്ചിലേക്ക് ടിക്കറ്റില്ലാത്ത ഒരാൾക്ക് എങ്ങനെയാണ് അനധികൃതമായി പ്രവേശിക്കാൻ കഴിഞ്ഞത് എന്നതിനെക്കുറിച്ചും റെയിൽവേയുടെ സുരക്ഷാ മാനദണ്ഡങ്ങൾ ലംഘിക്കപ്പെട്ടിട്ടുണ്ടോ എന്നതിനെക്കുറിച്ചും നിലവിൽ വിശദമായ വകുപ്പുതല അന്വേഷണത്തിന് ഉത്തരവിട്ടിട്ടുണ്ട്. അന്വേഷണം പൂർത്തിയാകുന്ന മുറയ്ക്ക് സംഭവത്തിന് കൂട്ടുനിന്ന മറ്റ് ഉത്തരവാദികൾക്കെതിരെയും കടുത്ത തുടർനടപടികൾ ഉണ്ടാകുമെന്ന് റെയിൽവേ മന്ത്രാലയം വ്യക്തമാക്കി.
