രാജ്യത്തെ നടുക്കിയ പഹൽഗാം ഭീകരാക്രമണത്തിന് പിന്നിലെ ഭീകരരുടെ ആസൂത്രണത്തെക്കുറിച്ചുള്ള കൂടുതൽ ഞെട്ടിക്കുന്ന വിവരങ്ങൾ ദേശീയ അന്വേഷണ ഏജൻസി (എൻ.ഐ.എ) പുറത്തുവിട്ടു. വിനോദസഞ്ചാരികളെ ലക്ഷ്യമിട്ടുള്ള ഈ ക്രൂരമായ ആക്രമണത്തിന്റെ പദ്ധതികൾ കൃത്യം ഒരാഴ്ച മുൻപ് തന്നെ തയ്യാറാക്കിയിരുന്നതായി എൻ.ഐ.എ കുറ്റപത്രത്തിൽ വ്യക്തമാക്കുന്നു. പാകിസ്താനിലിരിക്കുന്ന ഭീകരവാദ ഹാൻഡ്‌ലർ സാജിദ് ജാട്ട് അയച്ചുനൽകിയ ലൊക്കേഷൻ വിവരങ്ങൾ ട്രാക്ക് ചെയ്യുന്നതിനായി ഭീകരർ ഒരു ട്രെക്കിങ് മൊബൈൽ ആപ്ലിക്കേഷനാണ് ഉപയോഗിച്ചത്. പിന്നീട് ദാച്ചിഗാമിൽ നടന്ന ഏറ്റുമുട്ടലിൽ കൊല്ലപ്പെട്ട ഭീകരരുടെ ഫോണുകൾ പരിശോധിച്ചപ്പോഴാണ് ഈ മൊബൈൽ ആപ്പിലെ ഭൂപടങ്ങളുടെ സ്ക്രീൻഷോട്ടുകൾ കണ്ടെടുത്തത്. ഏപ്രിൽ 15, 16 തീയതികളിലായി എടുത്ത രണ്ട് മാപ്പ് സ്ക്രീൻഷോട്ടുകളും മറ്റ് ഡിജിറ്റൽ തെളിവുകളും ഫോട്ടോകളും കൊല്ലപ്പെട്ട ഭീകരന്റെ ഫോണിൽ നിന്ന് സുപ്രധാന തെളിവുകളായി ലഭിച്ചിട്ടുണ്ട്.
ആക്രമണത്തിനായി ഭീകരർക്ക് ആവശ്യമായ ആയുധങ്ങൾ പാകിസ്താനിൽ നിന്ന് ഡ്രോൺ വഴിയാണ് അതിർത്തി കടത്തി എത്തിച്ചു നൽകിയത്. ഏപ്രിൽ 22-ന് നടന്ന പഹൽഗാം ഭീകരാക്രമണത്തിൽ മൂന്ന് തീവ്രവാദികൾക്ക് നേരിട്ട് പങ്കുണ്ടെന്നാണ് എൻ.ഐ.എയുടെ കണ്ടെത്തൽ. രാജ്യത്തിന് നേരെ ഉണ്ടായ ഈ ഭീകരാക്രമണത്തിന് കനത്ത മറുപടിയായി, കഴിഞ്ഞ മെയ് 7-ന് ഇന്ത്യൻ സൈന്യം ‘ഓപ്പറേഷൻ സിന്ദൂർ’ എന്ന പേരിൽ പാകിസ്താനിലെയും പാകിസ്താൻ അധിനിവേശ കശ്മീരിലെയും (പി.ഒ.കെ) തീവ്രവാദ ഒളിത്താവളങ്ങളിൽ അതിശക്തമായ പ്രത്യാക്രമണം നടത്തി തകർത്തിരുന്നു. കേസിൽ കൂടുതൽ ഡിജിറ്റൽ തെളിവുകൾ കേന്ദ്രീകരിച്ചുള്ള അന്വേഷണം പുരോഗമിക്കുകയാണ്.
