ലോകകപ്പ് ഫുട്ബോളിന്റെ ആവേശം അലതല്ലുന്ന ഗാലറികളെ നിശ്ശബ്ദമാക്കിക്കൊണ്ട് ഫലസ്തീനിൽ ഇസ്രയേൽ യുദ്ധവെറിക്ക് ഇരയായി കൊല്ലപ്പെട്ട ആറുവയസ്സുകാരി ഹിന്ദ് റജബിന്റെ പേര് വീണ്ടും ആഗോളതലത്തിൽ ചർച്ചയാവുകയാണ്. ‘വെയർ ദി പീസ്’ എന്ന സംഘടന പുറത്തിറക്കിയ ഹിന്ദിന്റെ പേരെഴുതിയ ജഴ്സികളണിഞ്ഞാണ് കായികപ്രേമികൾ ലോകകപ്പ് വേദികളിൽ എത്തുന്നത്. വിനോദത്തിനപ്പുറം ഫുട്ബോൾ മനുഷ്യത്വത്തിന്റെ പക്ഷം ചേരലാണെന്ന് പ്രഖ്യാപിക്കുന്ന ഈ നീക്കം ഗാലറികളിൽ വലിയൊരു വിങ്ങലായി പെയ്തിറങ്ങുകയാണ്. പ്രിയപ്പെട്ട ടീമുകൾക്കായി ആർത്തുവിളിക്കുന്ന ഫുട്ബോൾ ആരാധകർ ഈ ജഴ്സികൾ കാണുമ്പോൾ ഒരു നിമിഷമെങ്കിലും ഫലസ്തീനിൽ ജീവൻ നഷ്ടപ്പെട്ട ആയിരക്കണക്കിന് കുഞ്ഞുങ്ങളെ ഓർക്കാൻ ഇത് കാരണമാകുന്നു.
ചുറ്റും പ്രിയപ്പെട്ടവരുടെ ചേതനയറ്റ ശരീരങ്ങൾക്കിടയിൽ ചോരയുറഞ്ഞുപോയ കാറിലിരുന്ന് ജീവനായി കരഞ്ഞ ഹിന്ദിന്റെ അവസാന നിമിഷങ്ങൾ മനുഷ്യമനസ്സാക്ഷിയെ പിടിച്ചുലച്ച ഒന്നായിരുന്നു. വെടിയൊച്ചകൾ നിലയ്ക്കാത്ത ഗസ്സയുടെ മണ്ണിൽ നിന്ന് ജീവനും കൊണ്ട് ഓടുന്നതിനിടയിലാണ് ഹിന്ദിന്റെ കുടുംബത്തിന് നേരെ ആക്രമണമുണ്ടായത്. ഇരുട്ടുവീഴുന്ന രാത്രിയിൽ പേടിയോടെ തന്നെ രക്ഷിക്കണമെന്ന് ഫോണിലൂടെ അവൾ ലോകത്തോട് ചോദിച്ച അവസാന ചോദ്യം ഇന്നും കാതുകളിൽ മുഴങ്ങുന്നുണ്ട്. എന്നാൽ രക്ഷാപ്രവർത്തകർ ഓടിയെത്തും മുൻപേ ഇസ്രയേൽ സൈന്യം ആ പിഞ്ചുകുഞ്ഞിന്റെ ജീവൻ അപഹരിക്കുകയായിരുന്നു. ലോകം ഉറ്റുനോക്കുന്ന കാൽപന്ത് വേദിയിൽ ഹിന്ദ് റജബ് എന്ന പേര് ഉയരുമ്പോൾ, അത് യുദ്ധ ക്രൂരതകൾക്കെതിരെയുള്ള ചരിത്രത്തിന്റെ വലിയൊരു വിചാരണയായി മാറുകയാണ്.
