രാജ്യത്ത് വിവാദമായ നീറ്റ് ചോദ്യപേപ്പർ ചോർച്ചയുടെ പശ്ചാത്തലത്തിൽ കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ അടിയന്തരമായി രാജിവെക്കണമെന്ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ ആവശ്യപ്പെട്ടു. നീറ്റ് പേപ്പർ ചോർച്ചയെത്തുടർന്ന് ഇതുവരെ ഇരുപതോളം വിദ്യാർഥികൾ ജീവനൊടുക്കിയെന്നും രാജ്യത്താകെ തൊണ്ണൂറോളം ചോദ്യപ്പേപ്പറുകൾ ചോർന്നതിലൂടെ കോടിക്കണക്കിന് യുവാക്കളുടെ ഭാവിയാണ് തകർന്നതെന്നും അദ്ദേഹം കുറ്റപ്പെടുത്തി. തങ്ങളുടെ അവകാശങ്ങൾക്കായി സംസാരിക്കുന്ന വിദ്യാർഥികളുടെ ശബ്ദത്തെ മന്ത്രി ‘തീവ്രവാദം’ എന്ന് വിളിച്ച് അധിക്ഷേപിക്കുകയാണെന്നും സർക്കാരിനോട് ചോദ്യങ്ങൾ ചോദിക്കുന്നവരെ രാജ്യദ്രോഹികളായി ചിത്രീകരിക്കുന്ന സമീപനമാണ് കേന്ദ്രത്തിന്റേതെന്നും ഖാർഗെ ആരോപിച്ചു. കഴിഞ്ഞ ഞായറാഴ്ച നടന്ന നീറ്റ് പുനഃപരീക്ഷയ്ക്ക് പിന്നാലെ ഉത്തർപ്രദേശിലെ ജലൗൺ സ്വദേശിനിയായ 19-കാരി ചഞ്ചൽ ഭാരതി കടുത്ത മാനസിക സമ്മർദ്ദത്തെ തുടർന്ന് ആത്മഹത്യ ചെയ്ത സംഭവം ഈ പ്രതിസന്ധിയുടെ ആഴം കൂട്ടുന്നു. ചഞ്ചലിന്റെ മുറിയിൽ നിന്നും നീറ്റ് ചോദ്യപേപ്പറും ആത്മഹത്യാക്കുറിപ്പും ലഭിച്ചതായി കുടുംബം വ്യക്തമാക്കുന്നുണ്ട്.
അതേസമയം, വിദ്യാഭ്യാസ മന്ത്രിയുടെ രാജി ആവശ്യപ്പെട്ട് കൊക്രോച്ച് ജനത പാർട്ടി ജന്തർ മന്തറിൽ നടത്തുന്ന പ്രതിഷേധം അഞ്ചാം ദിവസത്തിലേക്ക് കടന്നിരിക്കുകയാണ്. എന്നാൽ, പ്രതിഷേധത്തിൽ ഒരു വിദ്യാർഥി പോലും പങ്കെടുക്കുന്നില്ലെന്നും രാജ്യത്തെ ഭിന്നിപ്പിക്കാൻ ശ്രമിക്കുന്നവരാണ് ഇതിന് പിന്നിലെന്നുമാരോപിച്ച് മന്ത്രി ധർമേന്ദ്ര പ്രധാൻ ഈ സമരത്തെ തള്ളിക്കളഞ്ഞു. ഇതിനിടയിൽ, കഴിഞ്ഞദിവസം നടന്ന നീറ്റ് പുനഃപരീക്ഷയിൽ എത്ര പരീക്ഷാർത്ഥികൾ പങ്കെടുത്തു എന്നതുസംബന്ധിച്ച കൃത്യമായ കണക്കുകൾ പുറത്തുവിടാൻ നാഷണൽ ടെസ്റ്റിംഗ് ഏജൻസി (NTA) ഇതുവരെ തയ്യാറാകാത്തത് ഈ വിഷയത്തിലെ അവ്യക്തതയും ആശങ്കയും വർദ്ധിപ്പിക്കുന്നുണ്ട്.
