ഇതര ഭാഷാ ചിത്രങ്ങൾക്ക് മികച്ച സ്വീകാര്യത ലഭിക്കാറുള്ള കേരള ബോക്സ് ഓഫീസിൽ ഒൻപത് വർഷം പഴക്കമുള്ള റെക്കോർഡ് മറികടന്ന് രജനികാന്ത് ചിത്രം ‘ജയിലർ 2’. എസ്.എസ്. രാജമൗലിയുടെ ബിഗ് ബജറ്റ് ചിത്രം ‘ബാഹുബലി 2’ സ്ഥാപിച്ച കേരളത്തിലെ ഏറ്റവും ഉയർന്ന കളക്ഷൻ നേടിയ മറുഭാഷാ ചിത്രം എന്ന റെക്കോർഡാണ് ജയിലർ 2 സ്വന്തമാക്കിയത്. റിലീസ് ചെയ്ത് 13-ാം ദിനത്തിലാണ് ചിത്രം ഈ ചരിത്ര നേട്ടം കൈവരിച്ചത്. ബാഹുബലി 2-ന്റെ ലൈഫ് ടൈം കളക്ഷനായ 72.25 കോടി രൂപയെ മറികടന്ന്, 13-ാം ദിനത്തിൽ 72.85 കോടി രൂപ കളക്ഷൻ നേടാൻ ജയിലർ 2-ന് സാധിച്ചു. 2017-ൽ വിക്രം നായകനായ ‘ഐ’ എന്ന ചിത്രത്തിന്റെ 19.75 കോടി രൂപയുടെ ലൈഫ് ടൈം ഗ്രോസ് മറികടന്നാണ് ബാഹുബലി 2 ഈ റെക്കോർഡ് ഇട്ടിരുന്നത്. വർഷങ്ങൾക്ക് ശേഷം നിരവധി മറുഭാഷാ ചിത്രങ്ങൾ തരംഗം സൃഷ്ടിച്ചെങ്കിലും ബാഹുബലി 2-ന്റെ റെക്കോർഡ് തകർക്കാൻ സാധിച്ചിരുന്നില്ല.
ഇതോടെ കേരളത്തിൽ ഏറ്റവും കൂടുതൽ കളക്ഷൻ നേടിയ മറുഭാഷാ ചിത്രങ്ങളുടെ പട്ടികയിൽ ബാഹുബലി 2 രണ്ടാം സ്ഥാനത്തേക്ക് പിന്തള്ളപ്പെട്ടു. 64.98 കോടി നേടിയ ‘കെ.ജി.എഫ് 2’ മൂന്നാമതും, 59.64 കോടി നേടിയ ‘ലിയോ’ നാലാമതും, 54.76 കോടി നേടിയ ജയിലറിന്റെ ആദ്യ ഭാഗം അഞ്ചാമതും തുടരുന്നു. ‘കാന്താര ചാപ്റ്റർ 1’, ‘വിക്രം’, ‘കൽക്കി 2898 എഡി’, ‘കൂലി’, ‘ആർ.ആർ.ആർ’ എന്നീ ചിത്രങ്ങളാണ് പട്ടികയിലെ മറ്റു പ്രമുഖ ചിത്രങ്ങൾ. ഇതിനുപുറമെ, ആഗോള ബോക്സ് ഓഫീസിലും ഒരു തമിഴ് സിനിമ നേടുന്ന ഏറ്റവും വലിയ കളക്ഷൻ എന്ന റെക്കോർഡും ജയിലർ 2 തന്റെ പേരിലാക്കി മാറ്റിയിട്ടുണ്ട്.
