സ്വന്തം മണ്ണിൽ നടക്കുന്ന ലോകകപ്പിൽ കിരീടം ലക്ഷ്യമിട്ട് കുതിക്കുന്ന അമേരിക്കൻ കരുത്തിന് മുന്നിൽ ബോസ്നിയ വീണു. വാശിയേറിയ പ്രീക്വാർട്ടർ പോരാട്ടത്തിൽ എതിരില്ലാത്ത രണ്ട് ഗോളുകൾക്ക് ബോസ്നിയയെ തകർത്ത് യുഎസ്എ ക്വാർട്ടർ ഫൈനലിലേക്ക് യോഗ്യത നേടി. അമേരിക്കയ്ക്കായി ഫൊളാരിൻ ബലോഗൻ, മാലിക് ടിൽമാൻ എന്നിവർ ഗോളുകൾ നേടി. മത്സരത്തിൽ ഉടനീളം തിരിച്ചടിക്കാൻ ബോസ്നിയ കിണഞ്ഞു ശ്രമിച്ചെങ്കിലും അമേരിക്കൻ പ്രതിരോധം ഭേദിക്കാൻ അവർക്കായില്ല. പ്രീക്വാർട്ടർ കടമ്പ കടന്ന അമേരിക്കയ്ക്ക് ക്വാർട്ടർ ഫൈനലിൽ ശക്തരായ ബെൽജിയമാണ് എതിരാളികൾ.
ആദ്യപകുതി ഗോൾരഹിതമായി അവസാനിക്കുമെന്ന് കരുതിയിരുന്ന നിമിഷത്തിലാണ് ബോസ്നിയയെ ഞെട്ടിച്ച് അമേരിക്ക ആദ്യ ഗോൾ നേടുന്നത്. മത്സരത്തിന്റെ 32-ാം മിനിറ്റിൽ ഫൊളാരിൻ ബലോഗൻ പന്ത് വലയിലെത്തിച്ചിരുന്നെങ്കിലും റെഫറി അത് ഓഫ്‌സൈഡ് വിധിച്ചിരുന്നു. എന്നാൽ ആദ്യപകുതി അവസാനിക്കാൻ സെക്കൻഡുകൾ മാത്രം ബാക്കിനിൽക്കെ മാലിക് ടിൽമാൻ നൽകിയ പാസ് ബോസ്നിയൻ ഡിഫൻഡറുടെ കാലിൽ തട്ടി ബോക്സിനുള്ളിൽ ബലോഗന് തന്നെ ലഭിക്കുകയും, താരം അത് ലക്ഷ്യത്തിലെത്തിക്കുകയുമായിരുന്നു. ഈ ഗോളോടെ കൈവന്ന ആത്മവിശ്വാസവുമായാണ് അമേരിക്ക ഇടവേളയ്ക്ക് പിരിഞ്ഞത്.രണ്ടാം പകുതിയിൽ കളി തിരിച്ചുപിടിക്കാൻ ഉറച്ചാണ് ബോസ്നിയ ഇറങ്ങിയത്. അമേരിക്കൻ ഗോൾമുഖം ലക്ഷ്യമാക്കി അവർ നിരന്തരം ആക്രമണങ്ങൾ അഴിച്ചുവിട്ടെങ്കിലും ഒന്നും ഗോളായി മാറിയില്ല. ഇതിനിടെ മുന്നേറ്റ താരം ബലോഗന് ചുവപ്പുകാർഡ് ലഭിച്ചത് അമേരിക്കയ്ക്ക് വലിയ തിരിച്ചടിയായി. ബോസ്നിയൻ താരം മുഹെറമോവിക്കിൽ നിന്ന് പന്ത് തട്ടിയെടുക്കാനുള്ള ശ്രമത്തിനിടയിൽ അബദ്ധത്തിൽ കണങ്കാലിൽ ചവിട്ടിയതിനാണ് ബലോഗന് ചുവപ്പുകാർഡ് കണ്ട് പുറത്തുപോകേണ്ടി വന്നത്. പത്തുപേരിലേക്ക് ചുരുങ്ങി പ്രതിസന്ധിയിലായെങ്കിലും അമേരിക്ക പ്രതിരോധം കൂടുതൽ ശക്തമാക്കി. മത്സരത്തിനിടയിൽ അമേരിക്കയുടെ മറ്റൊരു ഗോൾ കൂടി ഓഫ്‌സൈഡ് കെണിയിൽ കുരുങ്ങിയിരുന്നു. എന്നാൽ 81-ാം മിനിറ്റിൽ ബോക്സിന് തൊട്ടുപുറത്തുനിന്ന് ലഭിച്ച ഫ്രീകിക്ക് മനോഹരമായി വലയിലെത്തിച്ചുകൊണ്ട് മാലിക് ടിൽമാൻ അമേരിക്കയുടെ വിജയമുറപ്പിച്ചു. ഈ ഗോൾ വഴങ്ങിയതോടെ ബോസ്നിയയുടെ തിരിച്ചുവരവ് പ്രതീക്ഷകൾ പൂർണ്ണമായും അവസാനിക്കുകയായിരുന്നു.
