പശ്ചിമേഷ്യയെ ഗ്രസിച്ച യുദ്ധഭീതിക്ക് താൽക്കാലിക ആശ്വാസമേകി ഇറാനും അമേരിക്കയും വെടിനിർത്തൽ കരാറിലെത്തിയതായി അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. ലോകം ഉറ്റുനോക്കിയ ഹോർമുസ് കടലിടുക്കിലൂടെയുള്ള കപ്പൽ ഗതാഗതം പുനരാരംഭിക്കാൻ ഇരുരാജ്യങ്ങളും തമ്മിൽ ധാരണയിലെത്തിയത് രാജ്യാന്തര വിപണിയിലും വലിയ ചലനങ്ങളുണ്ടാക്കി. പാകിസ്താൻ മധ്യസ്ഥത വഹിച്ചതും ചൈനയുടെ സജീവ ഇടപെടലും വഴി രൂപപ്പെട്ട പത്തിന നിർദ്ദേശങ്ങളാണ് സമാധാന ചർച്ചകൾക്ക് വഴിതുറന്നത്. വെള്ളിയാഴ്ച ഇസ്ലാമാബാദിൽ ഇരുരാജ്യങ്ങളും തമ്മിൽ നേരിട്ടുള്ള ഔദ്യോഗിക ചർച്ചകൾ ആരംഭിക്കാനിരിക്കെ, ഇറാന്റെ പുതിയ പരമോന്നത നേതാവായ ആയത്തുള്ള മുജ്തബ ഖമേനി വെടിനിർത്തൽ കരാറിന് അംഗീകാരം നൽകിയത് വലിയ വഴിത്തിരിവായി.
വെടിനിർത്തലിന്റെ ഭാഗമായി അടുത്ത രണ്ടാഴ്ചത്തേക്ക് കപ്പലുകൾക്ക് സുരക്ഷിത പാത ഒരുക്കുമെന്ന് ഇറാന്റെ വിദേശകാര്യമന്ത്രി അബ്ബാസ് അരാഗ്ചി അറിയിച്ചിട്ടുണ്ട്. അതേസമയം, യുദ്ധകാലത്ത് കപ്പലുകളിൽ നിന്ന് ഈടാക്കിയിരുന്ന ഭീമമായ തുകയുടെ കാര്യത്തിൽ ഇനിയും വ്യക്തത വരാനുണ്ട്. മിക്ക തർക്കവിഷയങ്ങളിലും ധാരണയായെന്നും രണ്ടാഴ്ചയ്ക്കുള്ളിൽ കരാർ അന്തിമമാകുമെന്നും ട്രംപ് അവകാശപ്പെടുമ്പോൾ, ഇസ്രായേൽ ഈ നീക്കത്തെ അതൃപ്തിയോടെയാണ് കാണുന്നത്. അമേരിക്കയുടെ സമ്മർദ്ദത്തിന് ഇസ്രായേൽ വഴങ്ങിയെങ്കിലും ഇറാന്റെ സൈനിക താവളങ്ങൾ ഇപ്പോഴും തങ്ങളുടെ ലക്ഷ്യത്തിലാണെന്ന മുന്നറിയിപ്പ് അവർ നൽകുന്നുണ്ട്. വെടിനിർത്തൽ പ്രഖ്യാപനത്തിന് പിന്നാലെ ആഗോള വിപണിയിൽ അസംസ്കൃത എണ്ണവില ബാരലിന് 92 ഡോളറായി താഴ്ന്നത് ലോകരാജ്യങ്ങൾക്ക് ആശ്വാസമായി. എന്നാൽ കരാർ ചർച്ചകൾ പുരോഗമിക്കവെ തന്നെ സൗദി, കുവൈത്ത്, യുഎഇ ഉൾപ്പെടെയുള്ള ഗൾഫ് രാജ്യങ്ങളിൽ ഇന്നലെയും ആക്രമണശ്രമങ്ങൾ ഉണ്ടായത് മേഖലയിലെ ആശങ്ക പൂർണ്ണമായും ഒഴിവായിട്ടില്ലെന്ന് സൂചിപ്പിക്കുന്നു.
