ഇസ്രയേലിനുമേൽ സമ്മർദ്ദം ചെലുത്തിയത് താനെന്ന് ട്രംപ്

ഹിസ്ബുല്ലയുമായി വെടിനിർത്തൽ കരാറിലേർപ്പെടാൻ ഇസ്രയേലിന് മേൽ ശക്തമായ സമ്മർദ്ദം ചെലുത്തിയത് താനാണെന്ന വെളിപ്പെടുത്തലുമായി അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്തെത്തി. ഇറാനുമായുള്ള സമാധാന കരാർ യാഥാർത്ഥ്യമാകണമെങ്കിൽ ലെബനോണിൽ വെടിനിർത്തൽ അനിവാര്യമാണെന്ന് എൻബിസി ന്യൂസിന് നൽകിയ അഭിമുഖത്തിൽ ട്രംപ് വ്യക്തമാക്കി. എന്നാൽ ഈ വിഷയത്തിൽ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി നേരിട്ട് സംസാരിച്ചിരുന്നോ എന്ന കാര്യം വ്യക്തമാക്കാൻ അദ്ദേഹം തയ്യാറായില്ല. അതേസമയം പശ്ചിമേഷ്യയിൽ സമാധാനം പുനഃസ്ഥാപിക്കാനുള്ള ശ്രമങ്ങളിൽ ഇസ്രയേലിന്റെ നിലപാടുകൾ ഇപ്പോഴും നിർണായകമായി തുടരുകയാണ്. വെടിനിർത്തൽ കരാർ പ്രാബല്യത്തിൽ വന്നിട്ടും ലെബനോനിൽ വീണ്ടും ഇസ്രയേൽ ആക്രമണങ്ങൾ റിപ്പോർട്ട് ചെയ്യപ്പെട്ടത് ആശങ്കയ്ക്ക് കാരണമായിട്ടുണ്ട്. ഈ പുതിയ സാഹചര്യത്തിൽ അമേരിക്കയും ഇറാനും തമ്മിലുള്ള സമാധാന ചർച്ചകൾ എപ്പോൾ ആരംഭിക്കുമെന്ന കാര്യത്തിൽ വലിയ രീതിയിലുള്ള അനിശ്ചിതത്വം നിലനിൽക്കുകയാണ്.

ഇറാനുമായുള്ള സമാധാന കരാർ നിശ്ചിത സമയത്തിനകം യാഥാർത്ഥ്യമായില്ലെങ്കിൽ അതിന്റെ പ്രത്യാഘാതം കഠിനമായിരിക്കുമെന്ന കടുത്ത മുന്നറിയിപ്പും ഡൊണാൾഡ് ട്രംപ് നൽകിയിട്ടുണ്ട്. വരും ദിവസങ്ങളിലെ ഏറ്റവും പ്രധാനപ്പെട്ട അജണ്ട ഇതാണെന്നും അടുത്ത 60 ദിവസത്തിനുള്ളിൽ ഇറാനുമായി ഔദ്യോഗിക കരാർ ഒപ്പിടേണ്ടതുണ്ടെന്നും അദ്ദേഹം ഓർമ്മിപ്പിച്ചു. അല്ലാത്തപക്ഷം ഇറാന് ഒട്ടും താല്പര്യമില്ലാത്ത കടുത്ത നടപടികളിലേക്ക് അമേരിക്കയ്ക്ക് കടക്കേണ്ടി വരുമെന്നാണ് ട്രംപിന്റെ ഭീഷണി. എന്നാൽ സമാധാന ധാരണാപത്രത്തിലെ ആദ്യ വ്യവസ്ഥകൾ പോലും പാലിക്കുന്നതിൽ അമേരിക്ക പരാജയപ്പെട്ടുവെന്ന് ഇറാന്റെ ദേശീയ സുരക്ഷാ കമ്മിറ്റി മേധാവി ഇബ്രാഹിം അസീസി കുറ്റപ്പെടുത്തി. ഈ തർക്കങ്ങൾക്കിടയിലും നിലവിൽ മാറ്റിവെച്ചിരിക്കുന്ന അമേരിക്ക – ഇറാൻ സമാധാന ചർച്ചകൾ വരും ദിവസങ്ങളിൽ തന്നെ നടക്കുമെന്ന് ഇറാന്റെ വിദേശകാര്യ മന്ത്രാലയം പ്രത്യാശയോടെ പ്രതികരിച്ചിട്ടുണ്ട്.

ഈ സുപ്രധാന ചർച്ചകൾക്ക് മുന്നോടിയായി അമേരിക്കയുടെ പശ്ചിമേഷ്യൻ പ്രത്യേക പ്രതിനിധി സ്റ്റീവ് വിറ്റ്കോഫ് സ്വിറ്റ്സർലണ്ടിലേക്ക് തിരിച്ചു കഴിഞ്ഞു. അമേരിക്കൻ വൈസ് പ്രസിഡന്റ് ജെ.ഡി. വാൻസും ട്രംപിന്റെ മരുമകനായ ജെറാദ് കഷ്നറും ഈ നിർണായക ചർച്ചകളിൽ പങ്കാളികളാകുമെന്നാണ് ലഭിക്കുന്ന വിവരം. പശ്ചിമേഷ്യയിൽ സമാധാനത്തിനായുള്ള അണിയറ നീക്കങ്ങൾ സജീവമാകുമ്പോഴും വെടിനിർത്തൽ പ്രഖ്യാപിക്കുന്നതിന് തൊട്ടുമുമ്പ് ലെബനോനിൽ ഇസ്രയേൽ നടത്തിയ വൻ ആക്രമണങ്ങളിൽ 47 പേർക്ക് ജീവൻ നഷ്ടമായിരുന്നു എന്നതും മേഖലയിലെ സങ്കീർണ്ണമായ അവസ്ഥയെ വ്യക്തമാക്കുന്നു.