ഇറാനും അമേരിക്കയും തമ്മിൽ രൂപീകരിച്ച പുതിയ സമാധാന കരാറിൽ കടുത്ത അതൃപ്തി പരസ്യമാക്കി ഇസ്രയേൽ രംഗത്തെത്തി. കരാറിന്റെ വിശദവിവരങ്ങൾ തങ്ങൾക്ക് കൈമാറണമെന്ന ഇസ്രയേലിന്റെ ഔദ്യോഗിക അഭ്യർത്ഥന അമേരിക്കൻ ഭരണകൂടം തള്ളിയതായാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. ഇതിനിടെ ജി-സെവൻ (G7) ഉച്ചകോടിയ്ക്കിടെ മാധ്യമങ്ങളോട് സംസാരിക്കവെ, ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ സമീപകാല നടപടികളിൽ താൻ അതീവ അസന്തുഷ്ടനാണെന്നും ഉത്തരവാദിത്തത്തോടെ പെരുമാറാൻ ഇസ്രയേൽ തയ്യാറാകണമെന്നും അമേരിക്കൻ പ്രസിഡന്റ് ഡോണൾഡ് ട്രംപ് തുറന്നടിച്ചു. അമേരിക്കയും ഇറാനും നേരിട്ടാണ് കരാറിൽ ഏർപ്പെട്ടിരിക്കുന്നത് എന്നതിനാൽ ഇസ്രയേൽ ഇതിൽ ഒരു കക്ഷിയല്ല. എന്നാൽ, ഹിസ്ബുല്ലയ്‌ക്കെതിരായ സൈനിക നടപടികൾ അവസാനിപ്പിച്ച് ലെബനനിൽ നിന്നും ഇസ്രയേൽ സൈന്യത്തെ പിൻവലിക്കണമെന്ന കർശന നിർദ്ദേശം ഈ കരാറിലുണ്ടെന്നാണ് ഇസ്രയേലി നയതന്ത്ര ഉദ്യോഗസ്ഥരെ ഉദ്ധരിച്ചുള്ള വിവരങ്ങൾ വ്യക്തമാക്കുന്നത്.
നിലവിലെ യുദ്ധ സാഹചര്യത്തിൽ ഇസ്രായേൽ സൈന്യം കൈവശപ്പെടുത്തിയ പ്രദേശങ്ങളിൽ നിന്ന് അവർ പൂർണ്ണമായി പിന്മാറാതെ യുദ്ധം അവസാനിക്കില്ലെന്ന് ഇറാന്റെ വിദേശകാര്യമന്ത്രി അബ്ബാസ് അരഗ്ചിയും ശക്തമായ ഭാഷയിൽ വ്യക്തമാക്കിയിട്ടുണ്ട്. ഈ നിർദ്ദേശങ്ങൾ ലംഘിച്ച് മുന്നോട്ട് പോവുകയും ഹിസ്ബുല്ലയ്‌ക്കെതിരായ ആക്രമണം അവസാനിപ്പിക്കാതിരിക്കുകയും ചെയ്താൽ ഇസ്രയേലിന് കനത്ത മറുപടി നൽകുമെന്നാണ് ഇറാൻ സേനയുടെ പുതിയ മുന്നറിയിപ്പ്. അതേസമയം, തന്ത്രപ്രധാനമായ ഈ സമാധാന കരാറിന്റെ ഭാഗമായി ഇറാനിൽ വൻകിട നിക്ഷേപങ്ങൾ പ്രോത്സാഹിപ്പിക്കുന്നതിനായി 300 ബില്യൺ ഡോളറിന്റെ ഭീമമായ ഒരു സ്വകാര്യ ഫണ്ട് രൂപീകരിക്കാൻ വ്യവസ്ഥയുള്ളതായും റിപ്പോർട്ടുകളുണ്ട്. ആഗോള ശ്രദ്ധയാകർഷിച്ച ഈ പ്രത്യേക ഫണ്ടിലേക്കാവശ്യമായ പകുതിയിലധികം തുകയും ഇതിനകം തന്നെ ഉറപ്പാക്കിക്കഴിഞ്ഞതായി പ്രമുഖ വാർത്താ ഏജൻസിയായ റോയിട്ടേഴ്‌സ് റിപ്പോർട്ട് ചെയ്യുന്നു.
