തലസ്ഥാനനഗരിയിലെ ദസറ ആഘോഷങ്ങളിൽ ഇത്തവണ വേറിട്ടൊരു പ്രതിഷേധ ദൃശ്യത്തിന് വേദി ഒരുങ്ങുന്നു. പരമ്പരാഗതമായി കത്തിക്കാറുള്ള രാവണൻ, കുംഭകർണ്ണൻ, മേഘനാദൻ എന്നിവരുടെ കോലങ്ങൾക്ക് പുറമെ 30 അടി ഉയരമുള്ള കൂറ്റൻ പാറ്റയുടെ കോലം കൂടി ഇക്കുറി ദില്ലിയിൽ ദഹനത്തിന് ഇരയാക്കും. പീതംപുരയിലെ എൻ.എസ്.പി കേശവ് രാംലീല കമ്മിറ്റി ഗ്രൗണ്ടിലാണ് ഈ വ്യത്യസ്തമായ ചടങ്ങ് നടക്കുന്നത്. കോക്റോച്ച് ജനത പാർട്ടി (സി.ജെ.പി) രാജ്യതലസ്ഥാനത്ത് പ്രതിഷേധം ശക്തമാക്കുന്ന പശ്ചാത്തലത്തിലാണ് രാംലീല കമ്മിറ്റിയുടെ ഈ ശ്രദ്ധേയമായ തീരുമാനം. ബി.ജെ.പി എം.എൽ.എയും ശ്രീ കേശവ് രാംലീല കമ്മിറ്റി പ്രസിഡന്ററുമായ അശോക് ഗോയൽ ദേവരഹയുടെ നേതൃത്വത്തിലാണ് പരിപാടി സംഘടിപ്പിക്കുന്നത്.
വീടുകളിൽ നിന്നും ചുറ്റുപാടുകളിൽ നിന്നും സമൂഹത്തിൽ നിന്നും മാലിന്യത്തെ പൂർണ്ണമായി തുടച്ചുനീക്കേണ്ടതിന്റെ ആവശ്യകത ജനങ്ങളെ ബോധ്യപ്പെടുത്താനാണ് ഇത്തരം ഒരു നീക്കമെന്ന് അശോക് ഗോയൽ എ.എൻ.ഐയോട് വ്യക്തമാക്കി. തിന്മയ്ക്ക് മേൽ നന്മ നേടുന്ന വിജയത്തെ സൂചിപ്പിക്കുന്ന വിജയദശമി ദിനത്തിൽ പണ്ടുമുതലേ രാവണന്റെയും മേഘനാദന്റെയും കുംഭകർണന്റെയും രൂപങ്ങൾ കത്തിക്കാറുണ്ടെന്നും, മുൻകാലങ്ങളിൽ നക്സലിസം, തീവ്രവാദം തുടങ്ങിയ വിപത്തുകളെ പ്രതീകാത്മകമായി കത്തിച്ചിട്ടുണ്ടെന്നും അദ്ദേഹം ഓർമ്മിപ്പിച്ചു. ഇത്തവണ മാലിന്യത്തിന്റെ പ്രതീകമായാണ് പാറ്റയുടെ കോലം കത്തിക്കുന്നത്. അതേസമയം, ദില്ലിയിൽ സി.ജെ.പി പ്രതിഷേധം തുടരുന്നതിനിടെ മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് കോണാട്ട് പ്ലേസിലെ സെൻട്രൽ പാർക്കിൽ അവർ ‘ലഹ്‌രാ ദോ തിരംഗ’ റാലി പ്രഖ്യാപിച്ചതിനെ തുടർന്ന് കൊണാട്ട് പ്ലേസിലും പരിസരത്തും സുരക്ഷ ശക്തമാക്കിയിട്ടുണ്ട്.
