പിഎസ്സി പരീക്ഷാ മൂല്യനിർണയത്തിലെ ഗുരുതരമായ വീഴ്ചയെക്കുറിച്ചുള്ള അന്വേഷണം വെറും പ്രഹസനമായി മാറുന്നതായി ആക്ഷേപം. പരീക്ഷാ നടത്തിപ്പിന്റെ നേരിട്ടുള്ള ചുമതലയുള്ള പരീക്ഷാ കൺട്രോളറെത്തന്നെയാണ് ഈ ക്രമക്കേട് അന്വേഷിക്കാനും പിഎസ്സി ചുമതലപ്പെടുത്തിയിരിക്കുന്നത്. വിഷയത്തിൽ കൃത്യമായ ഒരു ആഭ്യന്തര വിജിലൻസ് അന്വേഷണം വേണമെന്ന ആവശ്യം ശക്തമായിരുന്നെങ്കിലും അത് നടപ്പാക്കാതെ വന്നതോടെയാണ് പരീക്ഷാ കൺട്രോളർക്ക് തന്നെ അന്വേഷണച്ചുമതല കൈമാറിയത്. ആഭ്യന്തര വിജിലൻസിന്റെ തലവൻ പരീക്ഷാ കൺട്രോളർ ആയതുകൊണ്ടാണ് അന്വേഷണം അദ്ദേഹത്തെ ഏൽപ്പിച്ചതെന്നാണ് പിഎസ്സി അധികൃതരുടെ വിശദീകരണം. അതേസമയം, ഒരു പോലീസ് ഉദ്യോഗസ്ഥൻ നേതൃത്വം നൽകുന്നത് വിജിലൻസ് ആൻഡ് സെക്യൂരിറ്റി വിഭാഗത്തിനാണെന്നും നിലവിലെ അന്വേഷണം എത്രയും വേഗം പൂർത്തിയാക്കുമെന്നും പിഎസ്സി ചെയർമാൻ എം ആർ ബൈജു വ്യക്തമാക്കിയിട്ടുണ്ട്.
ആസൂത്രണ ബോർഡിലെ ചീഫ് ഇൻഡസ്ട്രി ആൻഡ് ഇൻഫ്രാസ്ട്രക്ചർ, ചീഫ് പ്ലാൻ കോ-ഓർഡിനേഷൻ ഡിവിഷൻ എന്നീ സുപ്രധാന തസ്തികകളിലേക്ക് നടന്ന വിവരണാത്മക പരീക്ഷയുടെ മൂല്യനിർണയത്തിലാണ് പിഎസ്‌സിയുടെ ഭാഗത്തുനിന്ന് വൻ വീഴ്ച സംഭവിച്ചത്. നൂറ് മാർക്കിനുള്ള ചോദ്യപേപ്പറിൽ ഒൻപത് മുതൽ പതിനെട്ട് വരെയുള്ള പത്ത് പ്രധാന ചോദ്യങ്ങളുടെ ഉത്തരങ്ങൾ മൂല്യനിർണയം നടത്താതെയാണ് പിഎസ്സി അന്തിമ റാങ്ക് ലിസ്റ്റ് പ്രസിദ്ധീകരിച്ചതും അതനുസരിച്ച് നിയമനം നടത്തിയതും. ഈ പരീക്ഷയുടെ റാങ്ക് പട്ടിക പുറത്തുവന്നതോടെ ഭരണകക്ഷിയിലെ പ്രമുഖ യൂണിയൻ നേതാവിന് ഒന്നാം റാങ്ക് ലഭിച്ചതിലും വലിയ രീതിയിലുള്ള ആക്ഷേപങ്ങൾ ഉയർന്നിരുന്നു. പരീക്ഷാ നടത്തിപ്പിലെയും മൂല്യനിർണയത്തിലെയും ഈ അനാസ്ഥ വലിയ വിവാദങ്ങൾക്ക് വഴിവെച്ചതോടെയാണ് കേരള അഡ്മിനിസ്ട്രേറ്റീവ് ട്രൈബ്യൂണൽ (കെഎടി) വിഷയത്തിൽ ഇടപെടുകയും തുടർനടപടികളിലേക്ക് നീങ്ങുകയും ചെയ്തത്.
