കൊച്ചി: സംസ്ഥാനത്ത് ലഹരിമാഫിയക്കെതിരെ പൊലീസ് നടത്തുന്ന ‘ഓപ്പറേഷന്‍ തൂഫാന്‍: ദി നാര്‍ക്കോ ഹണ്ട്’ ജനങ്ങൾ പൂർണ്ണമായും ഏറ്റെടുത്തുകഴിഞ്ഞതായി ആഭ്യന്തര മന്ത്രി രമേശ് ചെന്നിത്തല വ്യക്തമാക്കി. ഈ പദ്ധതിയുടെ ഭാഗമായി ഇതിനകം തന്നെ ഏകദേശം 70 കോടി രൂപയുടെ മയക്കുമരുന്നാണ് പൊലീസ് പിടികൂടിയതെന്നും അന്താരാഷ്ട്ര ലഹരി മാഫിയകള്‍ക്ക് മുന്നില്‍ ശക്തമായ പ്രതിരോധം തീര്‍ക്കാന്‍ താന്‍ എപ്പോഴും മുന്നിലുണ്ടാകുമെന്നും അദ്ദേഹം റിപ്പോര്‍ട്ടറിനോട് പ്രതികരിച്ചു. പെരുമ്പാവൂരില്‍ ഇന്ന് ആരംഭിക്കുന്ന ജനകീയ ബോധവല്‍ക്കരണ ക്യാംപെയിനായ ‘തൂഫാന്‍ ജാഗരൺ’ പരിപാടിക്ക് മുന്നോടിയായാണ് അദ്ദേഹം ഇക്കാര്യം വ്യക്തമാക്കിയത്. പെരുമ്പാവൂരിലെ മയക്കുമരുന്ന് ബാഹുല്യം തന്നെ ഞെട്ടിച്ചുവെന്നും അവിടം പൂർണ്ണമായി ക്ലീന്‍ ആക്കാന്‍ വിപുലമായ ബോധവല്‍ക്കരണം ആവശ്യമാണെന്നും പറഞ്ഞ മന്ത്രി, മയക്കുമരുന്ന് ഉപയോഗിക്കുന്നവരെ പൊലീസ് വെറുതെ വിടില്ലെന്നും കൂട്ടിച്ചേർത്തു. ഓപ്പറേഷന്‍ തൂഫാന്‍ ഇപ്പോൾ എന്റെ കൈകളിൽ നിന്ന് മാറി ജനങ്ങൾ ഏറ്റെടുത്തിരിക്കുകയാണെന്നും ജനങ്ങളാണ് ഇതിലെ യഥാർത്ഥ പോരാളികളെന്നും അതാണ് ഈ ദൗത്യത്തിന്റെ വിജയമെന്നും അദ്ദേഹം പറഞ്ഞു.
കേരളത്തില്‍ ലഹരിയുടെ വേരറുക്കുക തന്നെ ചെയ്യുമെന്നും ലഹരിമുക്തിക്കായി ചികിത്സയും ആശുപത്രി സൗകര്യങ്ങളും ലഭ്യമാക്കാൻ സർക്കാർ തയ്യാറാണെന്നും ചെന്നിത്തല ഉറപ്പുനൽകി. ലഹരിക്ക് അടിമപ്പെട്ടവരെ ജീവിതത്തിലേക്ക് തിരിച്ചുകൊണ്ടുവരാനുള്ള കൃത്യമായ പദ്ധതികൾ ഇവിടെയുണ്ട്. ഇതിന്റെ ഭാഗമായി പെരുമ്പാവൂരിലെ ഭായ് കോളനിയില്‍ നേരിട്ട് ചെന്ന് അതിഥി തൊഴിലാളികളെ കണ്ട് സംസാരിക്കുമെന്നും കേരളീയരായാണ് അവര്‍ ഇവിടെ ജീവിക്കുന്നതെന്നും അദ്ദേഹം ഓർമ്മിപ്പിച്ചു. കുട്ടികളെ മയക്കുമരുന്നിന് അടിമകളാക്കി മാറ്റാന്‍ അന്തര്‍ദേശീയ തലത്തിലുള്ള മാഫിയകള്‍ ശ്രമിക്കുന്നുണ്ട്. ഇതിനെതിരെ ഇപ്പോൾ പ്രതിരോധം തീർത്തില്ലെങ്കിൽ അത് വരുംതലമുറകളോട് ചെയ്യുന്ന വലിയ തെറ്റായിരിക്കും. സംസ്ഥാനത്ത് എംഡിഎംഎ നിർമ്മിക്കുന്ന ലാബുകള്‍ വരെ ഉണ്ടെന്നാണ് കേൾക്കുന്നത്. ലഹരി ഉപയോഗവും വിപണനവും പൂർണ്ണമായി അവസാനിപ്പിച്ചില്ലെങ്കിൽ പൊലീസ് നിങ്ങളെ നിയമത്തിന് മുന്നില്‍ കൊണ്ടുവരുമെന്നും കുറ്റകൃത്യം ചെയ്യുന്നവരെ കയ്യാമം വെക്കുമെന്നും അദ്ദേഹം മുന്നറിയിപ്പ് നൽകി. താനുമൊരു അച്ഛനാണെന്നും നമ്മുടെ കുഞ്ഞുങ്ങൾ അനാഥരാകാതെ മിടുക്കരായി വളരണമെന്ന ആഗ്രഹമുള്ളതുകൊണ്ടാണ് താനിതിനെ വൈകാരികമായി കാണുന്നതെന്നും ചെന്നിത്തല പറഞ്ഞു. ഈ ദൗത്യത്തിനായി കഴിഞ്ഞ ഒരുമാസക്കാലമായി കോണ്‍സ്റ്റബിള്‍ മുതല്‍ ഡിജിപി വരെയുള്ള കേരളത്തിലെ എല്ലാ പൊലീസുകാരും എടുത്ത അധ്വാനം ചെറുതല്ലെന്നും ആഭ്യന്തര മന്ത്രി അഭിനന്ദിച്ചു.
