പ്രതിപക്ഷ ഉപനേതാവ് പദവിയെച്ചൊല്ലി സി.പി.എമ്മും സി.പി.ഐയും തമ്മിൽ നിലനിൽക്കുന്ന തർക്കം മുന്നണിയുടെ കെട്ടുറപ്പിനെ ബാധിക്കുന്നുണ്ടെന്ന തുറന്നടിച്ച് കേരള കോൺഗ്രസ് (എം). തൊലിപ്പുറത്തെ ചികിത്സ കൊണ്ട് ഈ വിഷയം പരിഹരിക്കാനാകില്ലെന്ന് മാണി വ്യക്തമാക്കി. പ്രശ്നപരിഹാരത്തിന് ചർച്ചയാകാമെന്ന് വ്യക്തമാക്കിയ സി.പി.ഐ സംസ്ഥാന സെക്രട്ടറി ബിനോയ് വിശ്വം, വലിയ ത്യാഗങ്ങൾ സഹിച്ചാണ് പാർട്ടി ഇടതുമുന്നണിയിൽ തുടരുന്നതെന്നും ഓർമ്മിപ്പിച്ചു. വിഷയത്തിൽ തുറന്ന ചർച്ചകൾക്ക് സി.പി.ഐ സന്നദ്ധത പ്രകടിപ്പിക്കുന്നുണ്ടെങ്കിലും സമവായ നിർദ്ദേശങ്ങളിൽ ഇതുവരെ അന്തിമ തീരുമാനമായിട്ടില്ല.
ദേശീയ നേതൃത്വം ഇടപെട്ടുണ്ടാക്കിയ ശുപാർശകളിൽ വ്യക്തത വരുത്തേണ്ട ചുമതല ഇരു പാർട്ടികളുടെയും സംസ്ഥാന നേതൃത്വങ്ങൾക്കാണുള്ളത്. വിഷയം മുന്നണി പ്രവർത്തനത്തെയും പ്രതിപക്ഷ ഇടപെടലുകളെയും ബാധിക്കുന്നുവെന്ന അതൃപ്തിയാണ് ഘടകകക്ഷിയായ കേരള കോൺഗ്രസ് പരസ്യമായി പ്രകടിപ്പിക്കുന്നത്. എന്നാൽ, പ്രശ്നം കൂടുതൽ വഷളാക്കേണ്ടതില്ലെന്ന നിലപാടിലാണ് സി.പി.എമ്മും സി.പി.ഐയും. എങ്കിലും തർക്കപരിഹാരത്തിനായുള്ള ഉഭയകക്ഷി ചർച്ചകൾക്ക് ഇതുവരെ ഔദ്യോഗികമായി തുടക്കമായിട്ടില്ല.
