കാസർകോട്: കോവിഡ് ലോക്ക്ഡൗൺ കാലത്തെ കർശന നിയന്ത്രണങ്ങൾ കാറ്റിൽപ്പറത്തി ആറ് കിലോ കഞ്ചാവ് കടത്തിയ കേസിൽ രണ്ടുപേർക്ക് കോടതി കഠിനതടവും പിഴയും ശിക്ഷ വിധിച്ചു. കാഞ്ഞങ്ങാട് ആവിക്കര കെ.എം.കെ. ക്വാർട്ടേഴ്സിൽ താമസക്കാരനായ ആഷിഖ്, കല്ലൂരാവി പഴയക്കടപ്പുറം സ്വദേശി അസ്കർ അലി എന്നിവരെയാണ് കാസർകോട് അഡീഷണൽ ജില്ലാ സെഷൻസ് കോടതി ശിക്ഷിച്ചത്. പ്രതികൾക്ക് ഒരു വർഷം വീതം കഠിനതടവും ഇരുപതിനായിരം രൂപ വീതം പിഴയുമാണ് കോടതി ചുമത്തിയത്. പിഴത്തുക ഒടുക്കിയില്ലെങ്കിൽ പ്രതികൾ രണ്ടുമാസം വീതം അധിക തടവ് അനുഭവിക്കണമെന്നും വിധിന്യായത്തിൽ വ്യക്തമാക്കുന്നുണ്ട്. പ്രോസിക്യൂഷൻ സമർപ്പിച്ച ശക്തമായ തെളിവുകളുടെയും വ്യക്തമായ സാക്ഷിമൊഴികളുടെയും അടിസ്ഥാനത്തിലാണ് കോടതി ഈ ശിക്ഷാവിധി പ്രഖ്യാപിച്ചത്.
രാജ്യത്ത് കോവിഡ് മഹാമാരി പടർന്നുപിടിച്ചതിനെ തുടർന്ന് കേന്ദ്രസർക്കാർ ഏർപ്പെടുത്തിയ ലോക്ക്ഡൗൺ നിയന്ത്രണങ്ങൾ നിലനിന്നിരുന്ന 2020 ഏപ്രിൽ 29-നാണ് കേസിനാസ്പദമായ സംഭവം ഉണ്ടാകുന്നത്. മാസ്‌ക് ധരിക്കുകപോലും ചെയ്യാതെ ലോക്ക്ഡൗൺ നിർദ്ദേശങ്ങൾ ലംഘിച്ച് പിക്കപ്പ് ഓട്ടോറിക്ഷയിൽ കഞ്ചാവ് കടത്തുന്നതിനിടെ ബേക്കൽ ജംഗ്ഷനിൽ വെച്ചാണ് പ്രതികൾ പോലീസിന്റെ പിടിയിലാകുന്നത്. അന്നത്തെ ബേക്കൽ സബ് ഇൻസ്പെക്ടർ പി. അജിത്ത് കുമാറിന്റെ നേതൃത്വത്തിൽ എസ്.ഐ. വേണുഗോപാൽ, പോലീസ് ഉദ്യോഗസ്ഥരായ പ്രസാദ്, ജയേഷ് എന്നിവരടങ്ങിയ സംഘമാണ് പ്രതികളെയും കഞ്ചാവും കടത്താനുപയോഗിച്ച വാഹനവും കസ്റ്റഡിയിലെടുത്തത്. തുടർന്ന് ഇൻസ്പെക്ടർമാരായ പി. നാരായണൻ, നിസാം എസ്. എന്നിവർ കേസിന്റെ വിശദമായ അന്വേഷണം നടത്തുകയും ഇൻസ്പെക്ടർ വിപിൻ യു.പി. കോടതിയിൽ കുറ്റപത്രം സമർപ്പിക്കുകയുമായിരുന്നു.
