സൂര്യയെ നായകനാക്കി ജിത്തു മാധവൻ സംവിധാനം ചെയ്യുന്ന പുതിയ തമിഴ് ചിത്രം ‘സീൻ’ റിലീസിന് ഒരുങ്ങുന്നു. ‘ആവേശം’ എന്ന വൻ വിജയ ചിത്രത്തിന് ശേഷം ജിത്തു മാധവൻ ഒരുക്കുന്ന ചിത്രമായതിനാൽ തന്നെ വലിയ പ്രതീക്ഷയോടെയാണ് സിനിമാ ലോകം ഈ സിനിമയെ നോക്കിക്കാണുന്നത്. ചിത്രത്തിന്റെ പുറത്തുവന്ന ടൈറ്റിൽ ടീസറിന് മികച്ച പ്രതികരണമാണ് ലഭിച്ചത്. ഇതിന് പിന്നാലെ മാസ് ആക്ഷൻ എന്റർടെയ്നറായി ഒരുങ്ങുന്ന ഈ ചിത്രത്തിൽ യുവനടൻ നസ്ലെൻ വില്ലൻ വേഷത്തിലാണ് എത്തുന്നത് എന്ന തരത്തിലുള്ള ചർച്ചകളും പ്രേക്ഷകർക്കിടയിൽ സജീവമായിട്ടുണ്ട്. നസ്രിയ നായികയായി എത്തുന്ന ചിത്രം വരുന്ന ദീപാവലി റിലീസായി നവംബർ 6-ന് തിയറ്ററുകളിൽ എത്തും. ‘കറുപ്പ്’, ‘വിശ്വനാഥ് ആൻഡ് സൺസ്’ എന്നീ ചിത്രങ്ങൾക്ക് ശേഷം തിയറ്ററുകളിലെത്തുന്ന സൂര്യ ചിത്രമായതിനാൽ തന്നെ തുടർച്ചയായ മൂന്നാം വിജയമാണ് ആരാധകർ പ്രതീക്ഷിക്കുന്നത്. ഇതിനിടെ ചിത്രത്തിന്റെ ഏറ്റവും പുതിയ പോസ്റ്ററും അണിയറപ്രവർത്തകർ പുറത്തുവിട്ടിട്ടുണ്ട്.
കഴിഞ്ഞ വർഷം അവസാനം ചെന്നൈയിൽ നടന്ന പൂജ ചടങ്ങുകളോടെയാണ് ചിത്രീകരണത്തിന് തുടക്കമായത്. കേരളത്തിലും പ്രധാന ഭാഗങ്ങൾ ചിത്രീകരിച്ച ഈ സിനിമ സൂര്യയുടെ കരിയറിലെ 47-ാമത് ചിത്രമാണ്. വമ്പൻ ബജറ്റിലും കാൻവാസിലും ഒരുങ്ങുന്ന ചിത്രത്തിൽ സൂര്യ, നസ്രിയ, നസ്ലെൻ എന്നിവർക്ക് പുറമേ ജോൺ വിജയ്, ആനന്ദ് രാജ് തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. മലയാളി സംഗീത സംവിധായകൻ സുഷിൻ ശ്യാം ആദ്യമായി തമിഴിൽ സംഗീത സംവിധാനം നിർവഹിക്കുന്ന ചിത്രം കൂടിയാണിത്. ഴഗരം സ്റ്റുഡിയോസിന്റെ ബാനറിൽ നടി ജ്യോതിക നിർമ്മിക്കുന്ന ചിത്രത്തിന്റെ മ്യൂസിക് റൈറ്റ്സ് സോണി മ്യൂസിക് സ്വന്തമാക്കി. വിനീത് ഉണ്ണി പാലോട് ഛായാഗ്രഹണവും അജ്മൽ സാബു എഡിറ്റിംഗും നിർവഹിക്കുന്നു. അശ്വിനി കാലേ പ്രൊഡക്ഷൻ ഡിസൈനും ചേതൻ ഡിസൂസ സംഘട്ടന രംഗങ്ങളും ഒരുക്കുമ്പോൾ ശബരിയാണ് പി.ആർ.ഒ. ഇതിനിടെ സൈജു കുറുപ്പ് പ്രധാന വേഷത്തിലെത്തുന്ന ‘ആരം’ എന്ന ചിത്രത്തിന്റെ ട്രെയ്‌ലർ യൂട്യൂബിൽ ട്രെൻഡിങ്ങായി തുടരുന്നുണ്ട്.
