ടെഹ്‌റാൻ: മുൻപ് ഒപ്പുവെച്ച ധാരണാപത്രത്തിലെ വ്യവസ്ഥകൾ പൂർണ്ണമായി പാലിക്കാതെ അമേരിക്കയുമായി യാതൊരുവിധ നയതന്ത്ര ചർച്ചകൾക്കുമില്ലെന്ന് ഇറാൻ വ്യക്തമാക്കി. സമാധാന കരാറിലെ വ്യവസ്ഥകൾ പാലിക്കാൻ യുഎസ് തയ്യാറാകുന്നില്ലെങ്കിൽ രാജ്യം യുദ്ധത്തിന് പോലും സജ്ജമാണെന്ന് ഇറാനിയൻ പാർലമെന്റ് സ്പീക്കർ മുഹമ്മദ് ബാഖർ ഗാലിബാഫ് മുന്നറിയിപ്പ് നൽകി. ഒരു പ്രമുഖ ടെലിവിഷൻ മാധ്യമത്തിന് നൽകിയ അഭിമുഖത്തിലാണ് അദ്ദേഹം ഇറാന്റെ കടുത്ത നിലപാട് വ്യക്തമാക്കിയത്. രാജ്യത്തിന്റെ ആണവ അവകാശങ്ങളിലും അടിസ്ഥാനപരമായ നയങ്ങളിലും ഒരുതരത്തിലുള്ള വിട്ടുവീഴ്ചയ്ക്കും തയ്യാറല്ലെന്ന് വ്യക്തമാക്കിയ സ്പീക്കർ, ലെബനന് നേരെയുള്ള ആക്രമണങ്ങൾ അവസാനിപ്പിക്കുന്നത് ഉൾപ്പെടെയുള്ള സുപ്രധാന വ്യവസ്ഥകൾ പാലിക്കാൻ യുഎസ് ബാധ്യസ്ഥരാണെന്നും ഓർമ്മിപ്പിച്ചു. ലെബനന് നേരെ സൈനിക നീക്കങ്ങൾ ഉണ്ടാകില്ലെന്നും ജനങ്ങൾക്ക് തങ്ങളുടെ സ്വന്തം മണ്ണിലേക്ക് മടങ്ങാനാകുമെന്നും ലെബനന്റെ പരമാധികാരം സംരക്ഷിക്കപ്പെടുമെന്നും അമേരിക്ക മുൻപ് ഉറപ്പുനൽകിയിരുന്നതാണെങ്കിലും നിലവിൽ ആ വ്യവസ്ഥകളെല്ലാം ലംഘിക്കപ്പെടുകയാണെന്നും അദ്ദേഹം കുറ്റപ്പെടുത്തി.ഹോർമൂസ് കടലിടുക്കിലൂടെയുള്ള അന്താരാഷ്ട്ര കപ്പൽ ഗതാഗതം സുഗമമായി നിലനിർത്താൻ ധാരണാപത്രത്തിലെ വ്യവസ്ഥകൾ പ്രകാരം ഇറാൻ ഇപ്പോഴും പ്രതിജ്ഞാബദ്ധമാണെന്നും യുഎസിന്റെ ഭാഗത്തുനിന്നും സമാനമായ അനുകൂല സമീപനമാണ് രാജ്യം പ്രതീക്ഷിക്കുന്നതെന്നും അദ്ദേഹം കൂട്ടിച്ചേർത്തു. അന്താരാഷ്ട്ര ആണവ നിർവ്യാപന കരാറിലെ അംഗമെന്ന നിലയിൽ യുറേനിയം സമ്പുഷ്ടീകരണം ഇറാന്റെ നിയമപരമായ അവകാശമാണ്. ഈ കരാറിലെ വ്യവസ്ഥകൾ ഇറാൻ കൃത്യമായി പാലിക്കുമ്പോഴും തങ്ങളുടെ ആണവ അവകാശങ്ങളെ ചോദ്യം ചെയ്യാൻ ആരെയും അനുവദിക്കില്ലെന്നും രാജ്യം വ്യക്തമാക്കി. ഇറാൻ പ്രതിനിധികളുമായി നിലവിൽ യാതൊരുവിധ ചർച്ചകൾക്കുമില്ലെന്ന് വിദേശകാര്യ വക്താവ് ഇസ്മായിൽ ബഗായിയും കഴിഞ്ഞ ദിവസം വ്യക്തമാക്കിയിരുന്നു. എന്നാൽ ഇറാന്റെ കടുത്ത നിലപാടുകൾക്കിടയിലും, നയതന്ത്ര ചർച്ചകൾ പുനരാരംഭിക്കാനുള്ള നീക്കങ്ങളുമായി യുഎസ് പ്രതിനിധികൾ ഖത്തർ തലസ്ഥാനമായ ദോഹയിൽ എത്തിയിട്ടുണ്ട്. അമേരിക്കൻ പ്രസിഡന്റിന്റെ പ്രത്യേക പ്രതിനിധികളായ ജാരെദ് കുഷ്നർ, സ്റ്റീവ് വിറ്റ്കോഫ് എന്നിവരാണ് ചർച്ചകൾക്കായി എത്തിയത്. ഇരുവരും ഖത്തർ പ്രധാനമന്ത്രിയുമായി കൂടിക്കാഴ്ച നടത്തി പ്രതിസന്ധി പരിഹരിക്കാനുള്ള ശ്രമങ്ങൾ തുടരുകയാണ്.
