ന്യൂഡൽഹി: ആഗോള വിപണിയിൽ ക്രൂഡ് ഓയിൽ വിലയിലുണ്ടായ ഇടിവിനെ തുടർന്ന് പ്രമുഖ സ്വകാര്യ ഇന്ധന കമ്പനിയായ നയാര എനർജി പെട്രോൾ, ഡീസൽ വില കുറച്ചു. പെട്രോളിന് ലിറ്ററിന് 5 രൂപയും ഡീസലിന് 3 രൂപയുമാണ് കമ്പനി കുറച്ചിരിക്കുന്നത്. വിലക്കുറവ് നിലവിൽ വന്നതോടെ ഡൽഹിയിലെ നയാര പെട്രോൾ പമ്പുകളിൽ പെട്രോൾ ലിറ്ററിന് 105.71 രൂപയും ഡീസൽ ലിറ്ററിന് 94.31 രൂപയുമായി മാറിയിട്ടുണ്ട്. പശ്ചിമേഷ്യൻ മേഖലയിലെ സംഘർഷാവസ്ഥയ്ക്ക് അയവ് വന്നതിന് പിന്നാലെ രാജ്യത്ത് ഇന്ധനവില കുറയ്ക്കുന്ന ആദ്യ സ്വകാര്യ കമ്പനിയാണ് നയാര. നേരത്തെ പശ്ചിമേഷ്യൻ പ്രതിസന്ധി രൂക്ഷമായ ഘട്ടത്തിൽ ഇന്ത്യയിൽ ആദ്യമായി ഇന്ധനവില വർദ്ധിപ്പിച്ചതും ഇതേ കമ്പനിയായിരുന്നു.
ഇന്ധനവിലയ്ക്ക് പുറമെ രാജ്യത്ത് വാണിജ്യ ആവശ്യങ്ങൾക്കുള്ള എൽപിജി സിലിണ്ടറുകളുടെ വിലയിലും വലിയ കുറവുണ്ടായിട്ടുണ്ട്. വാണിജ്യ സിലിണ്ടറുകൾക്ക് ഒറ്റയടിക്ക് 183.50 രൂപ കുറച്ചതോടെ പുതിയ വില 2951 രൂപയായി നിശ്ചയിക്കപ്പെട്ടു. ഇത് രാജ്യത്തെ ഹോട്ടൽ വ്യാപാരികൾക്ക് വലിയ രീതിയിൽ നേരിയ ആശ്വാസം പകരുന്ന തീരുമാനമാണ്. എന്നാൽ സാധാരണക്കാർ ഉപയോഗിക്കുന്ന ഗാർഹിക എൽപിജി സിലിണ്ടറുകളുടെ വിലയിൽ ഇത്തവണ യാതൊരുവിധ മാറ്റവും വരുത്തിയിട്ടില്ല.
പശ്ചിമേഷ്യൻ യുദ്ധത്തെ തുടർന്ന് എൽപിജി ഇറക്കുമതി തടസ്സപ്പെട്ട പശ്ചാത്തലത്തിൽ വാണിജ്യ എൽപിജി സിലിണ്ടറുകൾക്ക് നേരത്തെ കേന്ദ്ര സർക്കാർ ഏർപ്പെടുത്തിയിരുന്ന കർശന നിയന്ത്രണങ്ങൾ ഇപ്പോൾ പൂർണ്ണമായും നീക്കിയിട്ടുണ്ട്. ആഗോളതലത്തിൽ പ്രതിസന്ധി ഉണ്ടായപ്പോൾ സിലിണ്ടറുകളുടെ എണ്ണത്തിൽ നിയന്ത്രണം ഏർപ്പെടുത്തുന്നതിനൊപ്പം കടുത്ത വിലക്കയറ്റവും രാജ്യം നേരിട്ടിരുന്നു. എന്നാൽ നിലവിൽ സ്ഥിതിഗതികൾ ശാന്തമായതോടെ യുദ്ധത്തിന് മുൻപുള്ള തരത്തിൽ തന്നെ പാചകവാതക വിതരണം സുഗമമായി പുനഃസ്ഥാപിക്കാനാണ് തീരുമാനമെന്ന് കേന്ദ്ര പെട്രോളിയം മന്ത്രാലയം വ്യക്തമാക്കി. നേരത്തെ കടുത്ത ക്ഷാമം നേരിട്ട ഘട്ടത്തിൽ എൽപിജി വിതരണത്തിൽ പ്രഥമ പരിഗണന രാജ്യത്തെ സാധാരണ കുടുംബങ്ങൾക്കായിരിക്കുമെന്ന് കേന്ദ്രം പ്രത്യേകം ഉറപ്പുനൽകിയിരുന്നു.
