തിരുവനന്തപുരം: നെയ്യാറ്റിൻകരയിൽ ബൈക്കിന്റെ അമിത ശബ്ദത്തെച്ചൊല്ലിയുള്ള തർക്കത്തിനിടെ ഇരുപത്തിരണ്ടുകാരനെ കുത്തിക്കൊലപ്പെടുത്തിയ കേസിൽ അച്ഛനും മക്കളുമടങ്ങുന്ന നാലംഗ സംഘത്തെ പോലീസ് അറസ്റ്റ് ചെയ്തു. കോട്ടുകാൽ കണ്ണറവിള സ്വദേശി മനുവാണ് കൊല്ലപ്പെട്ടത്. സംഭവവുമായി ബന്ധപ്പെട്ട് മനുവിന്റെ അയൽവാസിയായ ബിജു, ഇയാളുടെ മക്കളായ അമ്പാടി, മിഥുൻ, കൂടാതെ പ്രായപൂർത്തിയാകാത്ത പതിനേഴുകാരൻ എന്നിവരെയാണ് കാഞ്ഞിരമറ്റം പോലീസ് പിടികൂടിയത്. കഴിഞ്ഞ ഞായറാഴ്ച രാത്രി ഒൻപതരയോടെയായിരുന്നു നാടിനെ നടുക്കിയ കൊലപാതകം നടന്നത്. പ്രതികളായ അമ്പാടിയും പ്രായപൂർത്തിയാകാത്ത സുഹൃത്തും ചേർന്ന് നടത്തിയ അനധികൃത ബൈക്ക് റേസിംഗാണ് തർക്കങ്ങളുടെ തുടക്കം. ഓട്ടത്തിനിടയിൽ പെട്രോൾ തീർന്നതിനെ തുടർന്ന് ഇവർ മനുവിന്റെ വീടിന് സമീപത്തായി ബൈക്ക് നിർത്തി.
തുടർന്ന് പെട്രോൾ അടിച്ച ശേഷം ബൈക്ക് സ്റ്റാർട്ടാക്കാൻ ശ്രമിക്കുന്നതിനിടെ ഉണ്ടായ അമിത ശബ്ദത്തെക്കുറിച്ച് വീട്ടിൽ നിന്നിറങ്ങിവന്ന മനു ചോദ്യം ചെയ്യുകയായിരുന്നു. ഇത് പിന്നീട് ഇരുവിഭാഗങ്ങളും തമ്മിലുള്ള കടുത്ത വാക്കേറ്റത്തിൽ കലാശിച്ചു. പിന്നാലെ അമ്പാടി മറ്റു പ്രതികളെയും കൂട്ടി സ്ഥലത്തെത്തി മനുവിനെ ക്രൂരമായി ആക്രമിക്കുകയായിരുന്നു. മർദ്ദനത്തിനിടെ മനുവിന് വാരിയെല്ലിന് സമീപത്തായി ആഴത്തിൽ കുത്തേൽക്കുകയായിരുന്നു. ഉടൻ തന്നെ നെയ്യാറ്റിൻകരയിലെ ആശുപത്രിയിൽ എത്തിച്ചെങ്കിലും യുവാവിന്റെ ജീവൻ രക്ഷിക്കാനായില്ല. കേസിൽ അറസ്റ്റിലായ പ്രധാന പ്രതി മിഥുൻ, തനിക്ക് സംഭവത്തെക്കുറിച്ച് ഒന്നും അറിയില്ലെന്നും പരിക്കേറ്റ മനുവിന് താൻ വെള്ളം മാത്രമാണ് നൽകിയതെന്നുമാണ് സ്ഥലത്തെത്തിയ മാധ്യമങ്ങളോട് പ്രതികരിച്ചത്. സംഭവത്തിൽ കൊലപാതകക്കുറ്റത്തിന് കേസെടുത്ത പോലീസ് പ്രതികളെ വിശദമായി ചോദ്യം ചെയ്തുവരികയാണ്.
