സിപിഐഎം തിരുവനന്തപുരം ജില്ലാ സെക്രട്ടറിയേറ്റ് യോഗത്തിൽ നിന്ന് മുതിർന്ന നേതാവും മുൻ മന്ത്രിയുമായ വി. ശിവൻകുട്ടി വിട്ടുനിൽക്കുന്നു. വി. ജോയിയെ ജില്ലാ സെക്രട്ടറിയായി തുടരാൻ അനുവദിക്കുന്നതിലുള്ള കടുത്ത വിയോജിപ്പ് കാരണമാണ്, രാവിലെ ഒൻപതരയ്ക്ക് ആരംഭിച്ച നിർണായക യോഗത്തിൽ നിന്ന് അദ്ദേഹം മാറിനിൽക്കുന്നതെന്നാണ് സൂചന. നിയമസഭാ തിരഞ്ഞെടുപ്പ് ഫല അവലോകന റിപ്പോർട്ടിന്മേലുള്ള ചർച്ചയും പുതിയ ജില്ലാ സെക്രട്ടറിയുടെ തിരഞ്ഞെടുപ്പുമായിരുന്നു ഇന്നത്തെ യോഗത്തിന്റെ പ്രധാന അജണ്ടകൾ. സിപിഐഎം സംസ്ഥാന സമിതി അംഗമായ വി. ശിവൻകുട്ടി തിരുവനന്തപുരത്തെ എല്ലാ സംഘടനാ യോഗങ്ങളിലും മുടക്കമില്ലാതെ പങ്കെടുക്കുന്ന നേതാവാണ്. അദ്ദേഹം മന്ത്രിയായിരുന്ന കാലയളവിൽ പോലും ജില്ലാ സെക്രട്ടറിയേറ്റ് യോഗങ്ങളിൽ നിന്ന് ഒരിക്കൽ പോലും മാറിനിൽക്കുന്ന പതിവുണ്ടായിരുന്നില്ല എന്നതിനാൽ തന്നെ ഇപ്പോഴത്തെ വിട്ടുനിൽക്കൽ പാർട്ടി വൃത്തങ്ങളിൽ വലിയ ചർച്ചയായിട്ടുണ്ട്.
വി. ജോയിയെ ജില്ലാ സെക്രട്ടറിയാക്കാൻ കഴിഞ്ഞ ദിവസം ചേർന്ന ജില്ലയിൽ നിന്നുള്ള സംസ്ഥാന സമിതി അംഗങ്ങളുടെ യോഗത്തിലാണ് തീരുമാനമായത്. എന്നാൽ ഈ തീരുമാനത്തെ ശക്തമായി എതിർത്തുകൊണ്ട് കടകംപള്ളി സുരേന്ദ്രൻ രംഗത്തെത്തിയിരുന്നു. ജില്ലാ സെക്രട്ടറി സ്ഥാനത്തേക്ക് വി. ശിവൻകുട്ടിയുടെ പേര് നിർദേശിച്ച കടകംപള്ളി, അദ്ദേഹത്തെ ഈ പദവിയിലേക്ക് കൊണ്ടുവരണമെന്ന് ആവശ്യപ്പെട്ടെങ്കിലും, മുൻപ് സമ്മേളനം തിരഞ്ഞെടുത്ത വി. ജോയി തന്നെ സ്ഥാനത്ത് തുടരട്ടെ എന്ന നിലപാടാണ് സംസ്ഥാന നേതൃത്വം സ്വീകരിച്ചത്. മുതിർന്ന നേതാക്കളായ ആനാവൂർ നാഗപ്പൻ, എം. വിജയകുമാർ എന്നിവർ ജോയിയെ അനുകൂലിക്കുകയും ചെയ്തു. ജനപ്രതിനിധികളായ എംഎൽഎമാർ ജില്ലാ സെക്രട്ടറി സ്ഥാനം ഒഴിയണമെന്നാണ് സിപിഐഎമ്മിലെ പൊതുവായ സംഘടനാ രീതിയെങ്കിലും, തിരുവനന്തപുരം ജില്ലയിൽ നിലനിൽക്കുന്ന രൂക്ഷമായ തർക്കങ്ങൾ കാരണമാണ് വി. ജോയിക്ക് സ്ഥാനം ഒഴിയാൻ കഴിയാത്ത സാഹചര്യം ഉണ്ടായത്. നേരത്തെ നിയമസഭാ തിരഞ്ഞെടുപ്പിൽ മത്സരിച്ചതിനെ തുടർന്ന് വി. ജോയിയെ ജില്ലാ സെക്രട്ടറി സ്ഥാനത്ത് നിന്ന് താൽക്കാലികമായി മാറ്റിനിർത്തുകയും, സംസ്ഥാന കമ്മിറ്റി അംഗമായ എ.എ. റഹീമിന് ജില്ലാ സെക്രട്ടറിയുടെ താൽക്കാലിക ചുമതല നൽകുകയും ചെയ്തിരുന്നു.
