കൂടുതൽ ശക്തവും കാര്യക്ഷമവുമായി മാറുംതോറും ആർട്ടിഫിഷ്യൽ ഇന്റലിജൻസ് സംവിധാനങ്ങൾ മനുഷ്യരാശിയുടെ നിലനിൽപ്പിന് തന്നെ ഭീഷണിയാകാമെന്ന് സിലിക്കൺ വാലിക്ക് മുന്നറിയിപ്പുമായി ഓപ്പൺഎഐ ഗവേഷകൻ ഡാനിയൽ സെൽസം. 2022 മുതൽ ഓപ്പൺഎഐയിൽ പ്രവർത്തിക്കുന്ന അദ്ദേഹം ഭാഷാ മാതൃകകളുടെ അതിവേഗ വളർച്ചയിലും നിയന്ത്രണം നഷ്ടപ്പെടാൻ സാധ്യതയുള്ള ഭാവി സംവിധാനങ്ങളിലും അങ്ങേയറ്റം ആശങ്ക രേഖപ്പെടുത്തി. കൃത്രിമ ബുദ്ധിയുടെ വികസന വേഗത കുറയ്ക്കുന്നത് കൊണ്ടുമാത്രം ദീർഘകാല അപകടസാധ്യതകൾ പരിഹരിക്കാനാകില്ലെന്നും മൂന്നാം കക്ഷികളുടെ മേൽനോട്ടവും അന്താരാഷ്ട്ര ഏകോപനവും ഉൾപ്പെടെയുള്ള ശക്തമായ സുരക്ഷാ നടപടികൾ ആവശ്യമാണെന്നും അദ്ദേഹം ചൂണ്ടിക്കാട്ടുന്നു. തങ്ങൾ നിരീക്ഷിക്കപ്പെടുകയാണോ അതോ പരീക്ഷിക്കപ്പെടുകയാണോ എന്ന് സ്വയം തിരിച്ചറിയാനുള്ള കഴിവ് ഭാവിയിലെ എഐ സംവിധാനങ്ങൾ കൈവരിക്കുമെന്നതാണ് പ്രധാന വെല്ലുവിളി. ഇത് സുരക്ഷാ പരിശോധനകളിൽ ഒരു തരത്തിലും, മനുഷ്യരുടെ നേരിട്ടുള്ള നിയന്ത്രണമില്ലാത്തപ്പോൾ വേറൊരു തരത്തിലും പെരുമാറാൻ എഐയെ പ്രാപ്തമാക്കും.
നിലവിലെ പരിമിതികളെ സുരക്ഷയുടെ ഉറപ്പായി കാണരുതെന്നും സങ്കീർണ്ണമായ പ്രശ്നങ്ങൾ പരിഹരിച്ചും ഡാറ്റ വിശകലനം ചെയ്തും എഐ സ്വന്തം കഴിവുകൾ മെച്ചപ്പെടുത്താൻ തുടങ്ങിയിട്ടുണ്ടെന്നും സെൽസം വ്യക്തമാക്കുന്നു. ഇതിലൂടെ മനുഷ്യരുടെ നിയന്ത്രണത്തേക്കാൾ വേഗത്തിൽ എഐ മുന്നേറാൻ സാധ്യതയുണ്ട്. മനുഷ്യർ ഉദ്ദേശിക്കാത്ത ലക്ഷ്യങ്ങൾ സ്വയം രൂപീകരിച്ച് അത് നേടാൻ തീവ്ര നടപടികൾ സ്വീകരിച്ചാൽ അത് മനുഷ്യരാശിയുടെ നാശത്തിന് വരെ വഴിവെച്ചേക്കാം. ചൈനീസ് റെഗുലേറ്റർമാർ ഉൾപ്പെടെ എഐ വിഷയത്തിൽ അതീവ ജാഗ്രത പുലർത്തുന്നതിനിടെയാണ് ഈ മുന്നറിയിപ്പ്. സാങ്കേതിക സ്ഥാപനങ്ങളും രാജ്യങ്ങളും തമ്മിലുള്ള കൃത്യമായ ഏകോപനത്തിലൂടെ എഐ മനുഷ്യന്റെ നിയന്ത്രണം വിടുന്നത് തടയണമെന്നും, അല്ലാത്തപക്ഷം ഈ വികസനം പൊട്ടിത്തെറിക്കാൻ നിൽക്കുന്ന ഒരു ‘ടിക്ക് ചെയ്യുന്ന ടൈം ബോംബ്’ പോലെയായി മാറുമെന്നും ഡാനിയൽ സെൽസം കൂട്ടിച്ചേർത്തു.
