തമിഴ്‌നാടിന്റെ കായിക മേഖലയ്ക്ക് പുതിയ ദിശാബോധം പകർന്ന് തലസ്ഥാനമായ ചെന്നൈയിൽ ലോകോത്തര നിലവാരത്തിലുള്ള ‘തമിഴ്‌നാട് ഒളിമ്പിക് സിറ്റി’ നിർമ്മിക്കുമെന്ന് മുഖ്യമന്ത്രി സി. ജോസഫ് വിജയ് നിയമസഭയിൽ പ്രഖ്യാപിച്ചു. തമിഴ്‌നാട് സ്‌പോർട്‌സ് ഡെവലപ്‌മെന്റ് അതോറിറ്റിയുടെ മേൽനോട്ടത്തിൽ യാഥാർത്ഥ്യമാക്കുന്ന ഈ പദ്ധതിയിൽ അത്യാധുനിക കായിക സ്റ്റേഡിയങ്ങൾ, വിദേശനിലവാരത്തിലുള്ള പരിശീലന ഉപകരണങ്ങൾ, ഹൈ പെർഫോമൻസ് ട്രെയിനിംഗ് സെന്റർ, സ്‌പോർട്‌സ് സയൻസ്-സ്‌പോർട്‌സ് മെഡിസിൻ സെന്ററുകൾ, പരിശീലകർക്കും താരങ്ങൾക്കുമുള്ള അത്യാധുനിക താമസസൗകര്യങ്ങൾ എന്നിവ ഉൾപ്പെടുന്നു. ഒളിമ്പിക്‌സ് അടക്കമുള്ള അന്താരാഷ്ട്ര കായികമേളകളിൽ സംസ്ഥാനത്തുനിന്നുള്ള താരങ്ങൾക്ക് കൂടുതൽ മെഡലുകൾ ഉറപ്പാക്കുകയെന്ന ലക്ഷ്യത്തോടെയാണ് ഈ ഏകീകൃത കായിക ഹബ്ബ് നിർമ്മിക്കുന്നത്.
ഒളിമ്പിക് സിറ്റിക്കൊപ്പം ചെന്നൈയിൽ പ്രത്യേക ‘മോട്ടോർ സ്‌പോർട്‌സ് സിറ്റി’ സ്ഥാപിക്കുമെന്നും മുഖ്യമന്ത്രി പ്രഖ്യാപിച്ചിട്ടുണ്ട്. ഫോർമുല 1 മുതൽ ഫോർമുല 4 വരെയുള്ള റേസുകൾക്ക് ആതിഥേയത്വം വഹിക്കാനുള്ള ശേഷിയോടെയായിരിക്കും ഇത് സജ്ജമാക്കുക. 2028-ഓടെ ഫോർമുല 1 റേസിംഗ് ഇന്ത്യയിലേക്ക് തിരിച്ചെത്തിക്കുന്നതിന് കേന്ദ്ര കായിക മന്ത്രാലയം പ്രത്യേക ടാസ്‌ക് ഫോഴ്‌സിന് രൂപം നൽകുകയും, 2028-ൽ മോട്ടോ ജിപിയും ഡബ്ല്യുആർസിയും 2030-ഓടെ ഫോർമുല 1-ഉം സംഘടിപ്പിക്കാൻ ഫെഡറേഷൻ ഓഫ് മോട്ടോർ സ്‌പോർട്‌സ് ക്ലബ്‌സ് ഓഫ് ഇന്ത്യയുമായി ചേർന്ന് നീക്കങ്ങൾ നടത്തുകയും ചെയ്യുന്ന സാഹചര്യത്തിൽ, തമിഴ്‌നാട് സർക്കാരിന്റെ ഈ പുതിയ പ്രഖ്യാപനം ഇന്ത്യൻ കായികലോകത്ത് വലിയ പ്രതീക്ഷകളാണ് നൽകുന്നത്.
