ഇറാനെതിരെ അമേരിക്ക ആക്രമണം ശക്തമാക്കിയതോടെ മേഖലയിൽ യുദ്ധഭീതി മുറുകുന്നു. ബന്ദർ അബ്ബാസ്, ഖഷാം ദ്വീപ്, കൊണാർക്ക്, ചബഹാർ, ജാസ്ക്, സിരിക് എന്നിവിടങ്ങളിൽ അമേരിക്ക നടത്തിയ കനത്ത ബോംബാക്രമണങ്ങളിൽ വിവാഹച്ചടങ്ങിൽ പങ്കെടുത്ത ഒരു കുട്ടിയുൾപ്പെടെ നാലുപേർ കൊല്ലപ്പെടുകയും അമ്പതിലേറെ പേർക്ക് പരിക്കേൽക്കുകയും ചെയ്തു. ഇറാൻ തിരിച്ചടിച്ചാൽ ഇതിലും കടുത്ത പ്രത്യാഘാതം നേരിടേണ്ടിവരുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി. എന്നാൽ, മുന്നറിയിപ്പുകൾ അവഗണിച്ച് ജോർദാനിലെ യുഎസ് സൈനിക താവളങ്ങളിലേക്ക് മിസൈൽ ആക്രമണം നടത്തിയതായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) അവകാശപ്പെട്ടു. സാധാരണക്കാർക്ക് നേർക്കുണ്ടായ ക്രൂരമായ ആക്രമണത്തിനുള്ള മറുപടിയാണിതെന്നും, തിരിച്ചടിയിൽ നിരവധി യുഎസ് സൈനിക ഉപകരണങ്ങളും ഹെലികോപ്റ്ററുകളും കെട്ടിടങ്ങളും തകർത്തതായും ഐആർജിസി വ്യക്തമാക്കി. കൂടാതെ ഹോർമുസ് തീരത്തേക്ക് എത്തിയ യുഎസിന്റെ എം ക്യു-9 ഡ്രോണുകളെ പ്രതിരോധിച്ചതായും അവർ കൂട്ടിച്ചേർത്തു.
അതിനിടെ, ഹോർമുസ് കടലിടുക്കിൽ ഒമാനിലെ ഖസാബ് തുറമുഖത്തിന് സമീപം എണ്ണ ടാങ്കറിന് നേരെ മിസൈൽ ആക്രമണമുണ്ടായതായി യുകെ മാരിടൈം ട്രേഡ് ഓപ്പറേഷൻസ് അറിയിച്ചെങ്കിലും ആളപായമോ എണ്ണച്ചോർച്ചയോ റിപ്പോർട്ട് ചെയ്തിട്ടില്ല. അമേരിക്കയ്ക്ക് മേൽ സാമ്പത്തിക സമ്മർദ്ദം ചെലുത്താൻ എണ്ണ കയറ്റുമതി രാജ്യങ്ങൾ തയ്യാറാകണമെന്ന് ഇറാൻ ഡെപ്യൂട്ടി പാർലമെന്റ് സ്പീക്കർ ഹമീദ്രേസ ഹാജി ബാബേയ് ആവശ്യപ്പെട്ടു. അതേസമയം, ഇറാനെ ചർച്ചകളിലേക്ക് നയിക്കാനാണ് ഉപരോധങ്ങൾ ഏർപ്പെടുത്തിയതെന്ന് വ്യക്തമാക്കിയ യുഎസ് ട്രഷറി സെക്രട്ടറി സ്കോട്ട് ബെസന്റ്, സമ്മർദ്ദം കൂട്ടാൻ ചൈനീസ് ബാങ്കുകൾക്കെതിരെയും ഉപരോധത്തിന് ഒരുങ്ങുന്നതായി അറിയിച്ചു. എന്നാൽ, ജൂണിൽ ഒപ്പുവെച്ച ധാരണാപത്രത്തിലെ വ്യവസ്ഥകൾ അമേരിക്ക പാലിക്കുകയാണെങ്കിൽ ചർച്ചകൾക്ക് തയ്യാറാണെന്ന് ഷാങ്ഹായ് ഉച്ചകോടിയിൽ ഇറാൻ പ്രസിഡന്റ് മസൂദ് പെസഷ്കിയാൻ സൂചന നൽകി.
