കാന്തപുരം എ.പി. അബൂബക്കർ മുസ്‌ലിയാരുടെ വിവാദ സ്ത്രീവിരുദ്ധ പരാമർശത്തിനെതിരെ ശക്തമായ വിയോജിപ്പ് രേഖപ്പെടുത്തി മുഖ്യമന്ത്രി വി.ഡി. സതീശൻ. കാന്തപുരത്തിന്റെ പ്രസ്താവനയോട് ഒട്ടും യോജിപ്പില്ലെന്നും ഇത്തരം നിലപാടുകൾ പുരോഗമന കേരളത്തിന് ചേർന്നതല്ലെന്നും വാർത്താസമ്മേളനത്തിൽ സംസാരിക്കവെ മുഖ്യമന്ത്രി വ്യക്തമാക്കി. ഇത്തരം പരാമർശങ്ങളോട് ശക്തമായ എതിർപ്പാണുള്ളതെന്നും ഇവ ഇസ്‌ലാമിനെപ്പോലും തെറ്റായി വ്യാഖ്യാനിക്കുന്നതാണെന്നും അദ്ദേഹം കൂട്ടിച്ചേർത്തു. നബിദിന റാലിയുടെ ഭാഗമായി വിവിധ സ്ഥലങ്ങളിൽ സ്ത്രീ സാന്നിധ്യമുണ്ടായതാണ് കാന്തപുരത്തെയും അദ്ദേഹത്തിന്റെ പുരോഹിത സംഘടനയെയും പ്രകോപിപ്പിച്ചത്. സ്ത്രീകളെ പരസ്യമായി പ്രദർശിപ്പിക്കരുതെന്ന തരത്തിലുള്ള നിർദേശങ്ങളാണ് കാന്തപുരം നയിക്കുന്ന ജംഇയ്യത്തുൽ ഉലമയുടെ സർക്കുലറിൽ ഉണ്ടായിരുന്നത്.
അതേസമയം, കോൺഗ്രസ് മന്ത്രിമാർ ഉൾപ്പെടെയുള്ളവർ കാന്തപുരത്തിന്റെ നിലപാടിനെ തള്ളിപ്പറഞ്ഞപ്പോഴും മുസ്‌ലിം ലീഗ് വിഷയത്തിൽ തന്ത്രപരമായ നിലപാടാണ് സ്വീകരിക്കുന്നത്. കാന്തപുരത്തെ പൂർണ്ണമായി തള്ളാത്ത തരത്തിലായിരുന്നു ലീഗ് അധ്യക്ഷൻ പാണക്കാട് സാദിഖലി ശിഹാബ് തങ്ങളുടെ പ്രതികരണം. വർത്തമാനകാലത്ത് സ്ത്രീകൾ വേട്ടയാടപ്പെടുന്നുണ്ടെന്നും സ്ത്രീസുരക്ഷയും നിലവിലെ സാമൂഹിക സാഹചര്യവും മുൻനിർത്തിയാകാം കാന്തപുരം സംസാരിച്ചതെന്നും സാദിഖലി തങ്ങൾ പറഞ്ഞു. മതപണ്ഡിതന്റെ അഭിപ്രായമെന്ന നിലയിലും സമൂഹത്തിന്റെ നന്മയ്ക്ക് വേണ്ടിയുള്ള നിലപാടെന്ന രീതിയിലും അതിനോട് ചേർന്നുനിൽക്കുകയാണ് ലീഗ് ചെയ്യുന്നതെന്നും അദ്ദേഹം വ്യക്തമാക്കി.
