കോമൺവെൽത്ത് ഗെയിംസിലും മറ്റ് അന്താരാഷ്ട്ര കായിക മത്സരങ്ങളിലും മിന്നുന്ന പ്രകടനം കാഴ്ചവെച്ച മലയാളി കായികതാരങ്ങൾക്ക് സംസ്ഥാന സർക്കാർ പാരിതോഷികം പ്രഖ്യാപിച്ചു. കോമൺവെൽത്ത് ഗെയിംസ് ലോങ് ജമ്പിൽ വെള്ളി മെഡൽ നേടിയ ശ്രീശങ്കർ മുരളി, പുരുഷന്മാരുടെ പാര അത്‌ലറ്റിക്സ് 100 മീറ്ററിൽ വെള്ളി നേടിയ മുഹമ്മദ് ബാസിൽ എന്നിവർക്ക് 20 ലക്ഷം രൂപ വീതം നൽകാൻ മന്ത്രിസഭാ യോഗം തീരുമാനിച്ചു. കൂടാതെ, 12 വയസ്സിന് താഴെയുള്ളവരുടെ ലോക ചെസ്സ് ചാമ്പ്യൻഷിപ്പിൽ വിജയിയായ ദിവി ബിജേഷിനും അണ്ടർ-23 ഏഷ്യൻ ഗെയിംസ് മിക്സഡ് റിലേയിൽ സ്വർണം നേടിയ ഇന്ത്യൻ ടീമിലെ അംഗമായ സാന്ദ്ര മോൾ സാബുവിനും 20 ലക്ഷം രൂപ വീതം പാരിതോഷികം നൽകും. കഴിഞ്ഞ സർക്കാർ നൽകിയ തുകയേക്കാൾ 10 ലക്ഷം രൂപയുടെ വർധനവോടെയാണ് ഇത്തവണ കായികതാരങ്ങൾക്കുള്ള സമ്മാനത്തുക പ്രഖ്യാപിച്ചിരിക്കുന്നത്.
കോമൺവെൽത്ത് ഗെയിംസ് നീന്തലിൽ ഫൈനലിൽ പ്രവേശിച്ച സാജൻ പ്രകാശ്, 4×400 മീറ്റർ മിക്സഡ് റിലേയിലെ ഫൈനലിസ്റ്റായ അൻസ ബാബു എന്നിവർക്ക് അഞ്ച് ലക്ഷം രൂപ വീതവും കൈമാറും. നേട്ടത്തിന് പിന്നിൽ പ്രവർത്തിച്ച ശ്രീശങ്കർ മുരളിയുടെയും മുഹമ്മദ് ബാസിലിന്റെയും പരിശീലകർക്ക് രണ്ട് ലക്ഷം രൂപ വീതവും പാരിതോഷികമായി നൽകുമെന്ന് കായികമന്ത്രി ഒ.ജെ. ജനീഷ് വാർത്താസമ്മേളനത്തിൽ വ്യക്തമാക്കി.
