ജപ്പാനിലെ ഐച്ചി-നാഗോയയിൽ നടക്കാനിരിക്കുന്ന ഏഷ്യൻ ഗെയിംസിലെ ക്രിക്കറ്റ് മത്സരക്രമം സംഘാടകർ പുറത്തുവിട്ടു. സെപ്റ്റംബർ 19 മുതൽ ഒക്ടോബർ 4 വരെ നടക്കുന്ന ഏഷ്യൻ ഗെയിംസിൽ നിലവിലെ ചാമ്പ്യന്മാരായ ഇന്ത്യ പുരുഷ-വനിതാ വിഭാഗങ്ങളിൽ കരുത്തുറ്റ ടീമുകളുമായാണ് പോരാട്ടത്തിനിറങ്ങുന്നത്. വനിതകളുടെ ക്രിക്കറ്റ് മത്സരങ്ങൾ സെപ്റ്റംബർ 17-നും പുരുഷന്മാരുടേത് സെപ്റ്റംബർ 24-നും ആരംഭിക്കും. നിലവിലെ ടൂർണമെന്റ് ഘടന അനുസരിച്ച് ആരാധകർ കാത്തിരിക്കുന്ന ഇന്ത്യ-പാകിസ്ഥാൻ പോരാട്ടം നടക്കാൻ രണ്ട് സാധ്യതകൾ മാത്രമാണുള്ളത്. ഇരുടീമുകളും ക്വാർട്ടർ ഫൈനലും സെമിഫൈനലും കടന്ന് ഫൈനലിൽ എത്തിയാൽ സ്വർണമെഡൽ പോരാട്ടത്തിലോ, അല്ലാത്തപക്ഷം സെമിയിൽ തോറ്റാൽ വെങ്കല മെഡലിനായുള്ള പ്ലേ-ഓഫ് മത്സരത്തിലോ മാത്രമേ പരസ്പരം ഏറ്റുമുട്ടാനാകൂ.
ഗ്രൂപ്പ് ഘട്ടങ്ങളിലോ ക്വാർട്ടറിലോ സെമിയിലോ ഇരുടീമുകളും നേർക്കുനേർ വരില്ലെന്നതിനാൽ ഏഷ്യൻ ഗെയിംസിലെ ഏതെങ്കിലും ഒരു മെഡൽ മത്സരത്തിൽ മാത്രമേ ഇന്ത്യ-പാകിസ്ഥാൻ പോരാട്ടം സാധ്യമാകൂ. പുരുഷ വിഭാഗത്തിൽ ഉയർന്ന റാങ്കിംഗിന്റെ അടിസ്ഥാനത്തിൽ ഇന്ത്യ, പാകിസ്ഥാൻ, ബംഗ്ലാദേശ്, ശ്രീലങ്ക എന്നീ ടീമുകൾ നേരിട്ട് ക്വാർട്ടർ ഫൈനലിലേക്ക് യോഗ്യത നേടിയിട്ടുണ്ട്. യുവതാരം വൈഭവ് സൂര്യവംശി അടക്കമുള്ള 15 അംഗ കരുത്തുറ്റ ഇന്ത്യൻ പുരുഷ ടീമിനെ ശ്രേയസ് അയ്യർ നയിക്കുമ്പോൾ തിലക് വർമ്മയാണ് വൈസ് ക്യാപ്റ്റൻ. അതേസമയം, ഹർമൻപ്രീത് കൗർ നയിക്കുന്ന ഇന്ത്യൻ വനിതാ ടീം ക്വാർട്ടർ ഫൈനലിൽ ജപ്പാനെ നേരിടുമ്പോൾ പാകിസ്ഥാൻ വനിതാ ടീം തായ്‌ലൻഡിനെയാകും നേരിടുക. ജപ്പാനെ തോൽപ്പിച്ചാൽ ബംഗ്ലാദേശോ ചൈനയോ ആയിരിക്കും സെമിയിൽ ഇന്ത്യയുടെ എതിരാളികൾ.
