സൗദി അറേബ്യയിലെ ജിദ്ദയിൽ അന്താരാഷ്ട്ര നിലവാരത്തിലുള്ള അത്യാധുനിക ക്രിക്കറ്റ് സ്റ്റേഡിയം നിർമ്മിക്കാൻ പാകിസ്താൻ ഒരുങ്ങുന്നു. ഇത് സംബന്ധിച്ചുള്ള ചരിത്രപരമായ നിർമ്മാണ കരാറിൽ പാകിസ്താൻ ക്രിക്കറ്റ് ബോർഡും (പിസിബി) സൗദി ക്രിക്കറ്റ് ഫെഡറേഷനും (എസ്എസിഎഫ്) ഔദ്യോഗികമായി ഒപ്പുവെച്ചു. പാകിസ്താനെ പ്രതിനിധീകരിച്ച് പിസിബി ചെയർമാൻ മൊഹ്‌സിൻ നഖ്വിയും സൗദിയെ പ്രതിനിധീകരിച്ച് സൗദ് ബിൻ മിഷാൽ ബിൻ മുഹമ്മദ് അൽ സൗദുമാണ് ഈ സുപ്രധാന കരാറിൽ ഒപ്പുവെച്ചത്. അന്താരാഷ്ട്ര ക്രിക്കറ്റ് കൗൺസിലിന്റെ (ഐസിസി) കർശനമായ മാനദണ്ഡങ്ങൾ പൂർണ്ണമായും പാലിച്ചുകൊണ്ടായിരിക്കും ജിദ്ദയിലെ പുതിയ സ്റ്റേഡിയത്തിന്റെ നിർമ്മാണം പൂർത്തിയാക്കുക.
സ്റ്റേഡിയത്തിന്റെ ആസൂത്രണം, അടിസ്ഥാന സൗകര്യ വികസനം, ആവശ്യമായ സാങ്കേതിക വൈദഗ്ധ്യം ലഭ്യമാക്കൽ എന്നിവയുൾപ്പെടെയുള്ള പ്രധാന ചുമതലകളെല്ലാം പാകിസ്താൻ ക്രിക്കറ്റ് ബോർഡിന്റെ നേരിട്ടുള്ള മേൽനോട്ടത്തിലായിരിക്കും സജ്ജമാക്കുന്നത്. സൗദി അറേബ്യയിൽ ക്രിക്കറ്റ് കായിക വിനോദത്തിന്റെ വളർച്ചയ്ക്കും പ്രചാരണത്തിനും ഈ സ്റ്റേഡിയം നിർമ്മാണം വലിയ രീതിയിൽ സഹായകരമാകുമെന്നാണ് ഇരുപക്ഷവും വിലയിരുത്തുന്നത്. ജിദ്ദയിലെ ഈ പുതിയ പദ്ധതി സൗദിയിലെ ക്രിക്കറ്റ് പ്രോത്സാഹനത്തിന്റെ വലിയൊരു നാഴികക്കല്ലാണെന്നും, ഈ പങ്കാളിത്തം ക്രിക്കറ്റ് ലോകത്തെ കൂടുതൽ ഒന്നിപ്പിക്കാൻ കാരണമാകുമെന്നും കരാർ ഒപ്പിട്ട ശേഷം പിസിബി ചെയർമാൻ മൊഹ്‌സിൻ നഖ്വി പ്രത്യാശ പ്രകടിപ്പിച്ചു.
