ജനാധിപത്യ സംവിധാനത്തിൽ ക്ഷേമപ്രവർത്തനങ്ങൾ ആരുടെയും ഔദാര്യമല്ലെന്നും അത് ജനങ്ങളുടെ അവകാശമാണെന്നും മുഖ്യമന്ത്രി വി.ഡി. സതീശൻ. തിരുവനന്തപുരം സെൻട്രൽ സ്റ്റേഡിയത്തിൽ സ്വാതന്ത്ര്യ ദിനത്തോടനുബന്ധിച്ച് ത്രിവർണ പതാക ഉയർത്തിയ ശേഷം രാജ്യത്തെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം. ദുരന്തമുഖങ്ങളിൽ നിന്ന് അതിജീവിച്ചാണ് നാം മുന്നേറിയതെന്നും ഉണ്ടായ നഷ്ടങ്ങൾക്ക് പകരമാകാൻ ഒന്നിനും സാധിക്കില്ലെങ്കിലും ദുരിതബാധിതരായ കുടുംബങ്ങളെ സർക്കാർ എന്നും ചേർത്തു നിർത്തുമെന്നും അദ്ദേഹം ഉറപ്പുനൽകി. പ്രളയം ഉൾപ്പെടെയുള്ള പ്രകൃതിദുരന്തങ്ങളെ നേരിടാൻ ശാസ്ത്രീയമായ സമീപനങ്ങളാണ് സർക്കാർ സ്വീകരിക്കുന്നതെന്നും ഒറ്റക്കെട്ടായി ഏത് പ്രതിസന്ധിയെയും അതിജീവിക്കാൻ നമുക്ക് കഴിയുമെന്നും മുഖ്യമന്ത്രി കൂട്ടിച്ചേർത്തു.
ജാതി, മതം, ലിംഗവിവേചനം, രാഷ്ട്രീയ അന്ധത, വിദ്വേഷം എന്നിവ വെടിഞ്ഞ് എല്ലാവരും ഒറ്റക്കെട്ടായി മുന്നേറണമെന്ന് അദ്ദേഹം ആഹ്വാനം ചെയ്തു. മതേതരത്വം, ജനാധിപത്യ ബോധം, തുല്യത എന്നിവയാണ് നമ്മുടെ പ്രധാന കരുത്തും ഊർജ്ജവുമെന്നും അതിൽ യാതൊരു വിട്ടുവീഴ്ചയ്ക്കും തയ്യാറല്ലെന്നും അദ്ദേഹം വ്യക്തമാക്കി. സ്വാതന്ത്ര്യം ലഭിച്ച് 79 വർഷങ്ങൾ പിന്നിടുമ്പോഴും പട്ടിണി, രോഗം, തൊഴിലില്ലായ്മ എന്നീ വെല്ലുവിളികൾ രാജ്യത്തും കേരളത്തിലും ഇന്നും നിലനിൽക്കുന്നു എന്നത് യാഥാർത്ഥ്യമാണ്. രാജ്യവും ലോകവും ഇന്ന് പ്രത്യേകമായ ഒരു ഘട്ടത്തിലൂടെയാണ് കടന്നുപോകുന്നത്. ഈ സാഹചര്യത്തിൽ നമ്മുടെ യുവതയാണ് രാജ്യത്തിന്റെ യഥാർത്ഥ സമ്പത്തെന്നും തിരുത്തൽ ശക്തിയായി പ്രവർത്തിക്കാനും ഭാവിയിൽ രാജ്യത്തെ തെളിമയോടെ നയിക്കാനും അവർക്ക് കരുത്തുണ്ടെന്നും സമീപകാല സംഭവങ്ങൾ തെളിയിക്കുന്നതായി മുഖ്യമന്ത്രി ചൂണ്ടിക്കാട്ടി.
