സി.എം.ആർ.എൽ-എക്സാലോജിക് സാമ്പത്തിക ഇടപാട് കേസിൽ മുഖ്യമന്ത്രി പിണറായി വിജയന്റെ മകൾ വീണ വിജയൻ എൻഫോഴ്സ്മെന്റ് ഡയറക്ടറേറ്റിന് (ഇ.ഡി) മുന്നിൽ വീണ്ടും ചോദ്യം ചെയ്യലിനായി ഹാജരായി. ഈ മാസം 29-ാം തീയതി ഹാജരാകാമെന്നാണ് വീണ നേരത്തെ അറിയിച്ചിരുന്നതെങ്കിലും അപ്രതീക്ഷിതമായാണ് ഇന്നത്തെ ഹാജരാകൽ. കേന്ദ്ര കോർപ്പറേറ്റ് കാര്യ മന്ത്രാലയത്തിന് കീഴിലുള്ള അന്വേഷണ ഏജൻസിയായ എസ്.എഫ്.ഐ.ഒ തങ്ങളുടെ കുറ്റപത്രത്തിന്റെ ഭാഗമായുള്ള 134 സുപ്രധാന രേഖകൾ ഇന്നലെ ഇഡിക്ക് കൈമാറിയിരുന്നു. കോടതിയുടെ മുൻ ഉത്തരവ് ഉണ്ടായിരുന്നിട്ടും എസ്.എഫ്.ഐ.ഒയിൽ നിന്ന് ഈ രേഖകൾ ലഭിക്കാൻ താമസം നേരിട്ടിരുന്നു. പുതുതായി ലഭിച്ച ഈ നിർണായക തെളിവുകൾ കൂടി മുൻനിർത്തിയായിരിക്കും ഇ.ഡിയുടെ ഇപ്പോഴത്തെ ചോദ്യം ചെയ്യൽ.
കഴിഞ്ഞ ജൂൺ 17-ന് നടത്തിയ ആദ്യഘട്ട ചോദ്യം ചെയ്യലിന്റെ തുടർച്ചയായാണ് ഇന്നത്തെ നടപടികൾ. അന്ന് ഹാജരായപ്പോൾ പല ബാങ്ക് അക്കൗണ്ട് വിവരങ്ങളും കരാർ രേഖകളും സമർപ്പിക്കാൻ കൂടുതൽ സാവകാശം വേണമെന്ന് വീണ ഇഡിയോടും ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണ് ചോദ്യം ചെയ്യൽ നീട്ടിനൽകിയത്. തുടർന്ന് വീണ നൽകിയ അക്കൗണ്ട് വിശദാംശങ്ങളും കരാർ രേഖകളും പരിശോധിച്ച ഇ.ഡി, തിരുവനന്തപുരത്തെ ഒരു സ്വകാര്യ ബാങ്കിലുള്ള ലോക്കർ തുറന്നടക്കം വിപുലമായ പരിശോധനകൾ നടത്തിയിരുന്നു. കൂടാതെ, വീണയുടെ മുൻ മൊഴികളുടെ അടിസ്ഥാനത്തിൽ കരിമണൽ കമ്പനിയായ സി.എം.ആർ.എൽ, എംപവർ ഇന്ത്യ ക്യാപിറ്റൽ എന്നിവയുടെ ഡയറക്ടർമാരായ ശശിധരൻ കർത്തയുടെ കുടുംബാംഗങ്ങളെയും ഇ.ഡി ചോദ്യം ചെയ്തിരുന്നു. ഈ മൊഴികളിലെ വിവരങ്ങളും പുതിയ രേഖകളും പരസ്പരം ഒത്തുനോക്കിയാകും തുടരന്വേഷണം.
കരിമണൽ കമ്പനി നടത്തിയ സാമ്പത്തിക ഇടപാടുകളെക്കുറിച്ചുള്ള വ്യക്തമായ ഡിജിറ്റൽ, രേഖാമൂലമുള്ള തെളിവുകൾ ഇ.ഡിയുടെ കൈവശമുള്ളതിനാൽ ഈ ചോദ്യം ചെയ്യൽ വീണ വിജയന് ഏറെ നിർണായകമാണ്. ചോദ്യം ചെയ്യലിന് ശേഷം അറസ്റ്റ് ഉൾപ്പെടെയുള്ള കടുത്ത നടപടികളിലേക്ക് അന്വേഷണസംഘം കടക്കുമോ എന്ന കാര്യം വ്യക്തമല്ല. കേസിന്റെ അന്വേഷണ പുരോഗതി ഇ.ഡി ഡയറക്ടർ രാഹുൽ നവീൻ നേരിട്ട് വിലയിരുത്തുന്നുണ്ട് എന്നതിനാൽ ഡയറക്ടറേറ്റിന്റെ അന്തിമ തീരുമാനങ്ങൾ ഈ കേസിൽ നിർണായകമാകും. 2024-ൽ ആരംഭിച്ച ഈ കേസ് അന്വേഷണത്തിൽ ഇതുവരെ ആരുടെയും അറസ്റ്റ് ഇ.ഡി രേഖപ്പെടുത്തിയിട്ടില്ല എന്നതും ശ്രദ്ധേയമാണ്.
