പതിനെട്ടാമത് ബ്രിക്സ് ഉച്ചകോടി വൻ വിജയമായി മാറിയെന്ന് പ്രധാനമന്ത്രി നരേന്ദ്ര മോദി. സെമികോൺ ഇന്ത്യ സമ്മേളനത്തിന്റെ ഉദ്ഘാടനച്ചടങ്ങിൽ സംസാരിക്കവെയാണ് ബ്രിക്സ് ഉച്ചകോടിയുടെ വിജയം ചൂണ്ടിക്കാട്ടിയ അദ്ദേഹം, ലോകരാജ്യങ്ങൾക്ക് ഇന്ത്യയിലുള്ള വിശ്വാസം വർദ്ധിച്ചുവരുന്നതിന്റെ തെളിവാണ് ഇതെന്ന് കൂട്ടിച്ചേർത്തത്. പശ്ചിമേഷ്യൻ പ്രതിസന്ധിയിൽ ഇറാനും യു.എ.ഇയും തമ്മിൽ അഭിപ്രായവ്യത്യാസങ്ങൾ നിലനിന്നിട്ടും അംഗരാജ്യങ്ങളുടെ പിന്തുണയോടെ സംയുക്ത പ്രഖ്യാപനം അംഗീകരിക്കാൻ സാധിച്ചത് ഇന്ത്യയുടെ ആഗോള വിശ്വാസ്യതയ്ക്കും നയതന്ത്ര സമവായത്തിനും തെളിവാണെന്ന് അദ്ദേഹം വ്യക്തമാക്കി. ആഗോള വെല്ലുവിളികൾ നിലനിൽക്കുമ്പോഴും ഏറ്റവും പുതിയ കണക്കുകൾ പ്രകാരം 7.8 ശതമാനം ജി.ഡി.പി വളർച്ച നേടി ഇന്ത്യൻ സമ്പദ്‌വ്യവസ്ഥ കരുത്ത് കാട്ടുകയാണെന്നും പ്രധാനമന്ത്രി പറഞ്ഞു.
ഇന്ത്യയുടെ സെമികണ്ടക്ടർ മേഖല അതിവേഗം വികസിക്കുകയാണെന്ന് വ്യക്തമാക്കിയ പ്രധാനമന്ത്രി, സൂറത്തിലും മൊഹാലിയിലും രണ്ട് പുതിയ സെമികണ്ടക്ടർ പ്ലാന്റുകൾ സ്ഥാപിച്ച കാര്യവും പ്രഖ്യാപിച്ചു. ഇന്ത്യ സെമികണ്ടക്ടർ മിഷന്റെ രണ്ടാം ഘട്ടത്തിന് തുടക്കമായിക്കഴിഞ്ഞു. ഇത് നൂതനാശയങ്ങൾക്കും നിക്ഷേപങ്ങൾക്കും വലിയ അവസരങ്ങൾ തുറന്നുനൽകും. രാജ്യത്തിന്റെ നൂറ്റാണ്ടുകൾ പഴക്കമുള്ള നവീകരണ പാരമ്പര്യവും ഇരുപത്തിയൊന്നാം നൂറ്റാണ്ടിലെ സാങ്കേതികവിദ്യയും ഒത്തുചേരുമ്പോൾ അത് ‘ആത്മനിർഭർ ഭാരത്’, ‘വികസിത് ഭാരത്’ എന്നീ ലക്ഷ്യങ്ങളിലേക്ക് ഇന്ത്യക്ക് കൂടുതൽ ഊർജ്ജം പകരുകയാണെന്നും മോദി ചൂണ്ടിക്കാട്ടി.
