വരുന്ന തിങ്കളാഴ്ച ആരംഭിക്കുന്ന പാർലമെന്റിന്റെ മഴക്കാല സമ്മേളനത്തിൽ വിദേശ സംഭാവന നിയന്ത്രണ നിയമ ഭേദഗതി ബിൽ (എഫ്.സി.ആർ.എ) പാസാക്കാൻ കേന്ദ്രസർക്കാർ ഒരുങ്ങുന്നു. നിയമഭേദഗതിയുമായി ബന്ധപ്പെട്ട് പൊതുജനങ്ങൾക്കും എൻ.ജി.ഓകൾക്കും ഇടയിലുള്ള സംശയങ്ങളും ആശങ്കകളും ദുരീകരിക്കുന്നതിനായി കേന്ദ്ര ആഭ്യന്തര മന്ത്രാലയം വിശദീകരണം പുറത്തുവിട്ടു. ഇന്ത്യയിലെ വ്യക്തികളും സംഘടനകളും വിദേശത്തുനിന്ന് പണമോ സാമ്പത്തിക സഹായങ്ങളോ സ്വീകരിക്കുന്നത് നിയന്ത്രിക്കാനാണ് എഫ്.സി.ആർ.എ നിയമം നടപ്പിലാക്കുന്നത്. ഇത് സന്നദ്ധ സംഘടനകളെ നിരോധിക്കാനുള്ള നിയമമല്ലെന്നും, ഫണ്ടിന്റെ ഉറവിടവും വിനിയോഗവും സുതാര്യമാക്കാനും രാജ്യത്തിന്റെ പരമാധികാരം സംരക്ഷിക്കാനുമുള്ള രജിസ്ട്രേഷൻ സംവിധാനമാണെന്നും മന്ത്രാലയം വ്യക്തമാക്കുന്നു. 2024-25 സാമ്പത്തിക വർഷത്തിൽ മാത്രം 16,200-ഓളം എൻ.ജി.ഓകൾ രജിസ്റ്റർ ചെയ്യുകയും 22,963 കോടി രൂപ വിദേശ സംഭാവനയായി സ്വീകരിക്കുകയും ചെയ്തിട്ടുണ്ട്.
1976-ൽ നിലവിൽ വന്ന ഈ നിയമത്തിൽ 1984, 2010, 2020, 2022 വർഷങ്ങളിൽ ഘട്ടങ്ങളായി മാറ്റങ്ങൾ വരുത്തിയിരുന്നു. 2026-ലെ പുതിയ ഭേദഗതി പ്രകാരം രജിസ്ട്രേഷൻ റദ്ദാക്കപ്പെടുന്ന സംഘടനകളുടെ സ്വത്തുക്കൾ താത്കാലികമായി നിയന്ത്രിക്കാൻ ‘ഡെസിഗ്നേറ്റഡ് അതോറിറ്റി’ രൂപീകരിക്കും. എന്നാൽ ഇതിനെതിരെ 90 ദിവസത്തിനകം ഡിസ്ട്രിക്റ്റ് ജഡ്ജ് കോടതിയിൽ അപ്പീൽ നൽകാൻ അവസരമുണ്ടാകും. ഭരണപരമായ ആവശ്യങ്ങൾക്ക് ഫണ്ടിന്റെ പരമാവധി 20 ശതമാനം മാത്രമേ ഉപയോഗിക്കാവൂ എന്നും, ബാക്കി 80 ശതമാനവും വിദ്യാഭ്യാസ, ആരോഗ്യ, ഗ്രാമീണ വികസന, സാമൂഹിക ക്ഷേമ പ്രവർത്തനങ്ങൾക്കായി മാറ്റിവെക്കണമെന്നും വ്യവസ്ഥ ചെയ്യുന്നു. കൂടാതെ നിയമലംഘനങ്ങൾക്കുള്ള പരമാവധി തടവുശിക്ഷ അഞ്ച് വർഷത്തിൽ നിന്ന് ഒരു വർഷമായി കുറയ്ക്കുകയും, അന്വേഷണങ്ങൾക്ക് മുൻപ് കേന്ദ്ര അനുമതി നിർബന്ധമാക്കുകയും ചെയ്തിട്ടുണ്ട്. തെരഞ്ഞെടുപ്പ് സ്ഥാനാർത്ഥികൾ, ജനപ്രതിനിധികൾ, ന്യായാധിപന്മാർ, സർക്കാർ ഉദ്യോഗസ്ഥർ, രാഷ്ട്രീയ പാർട്ടികൾ, മാധ്യമപ്രവർത്തകർ എന്നിവർക്ക് വിദേശ ഫണ്ട് സ്വീകരിക്കുന്നതിൽ പൂർണ്ണ വിലക്കുണ്ട്. അമേരിക്ക, ഓസ്ട്രേലിയ, ബ്രിട്ടൻ, കാനഡ തുടങ്ങിയ രാജ്യങ്ങളിലും സമാന നിയമങ്ങൾ നിലവിലുണ്ടെന്നും, ഏതെങ്കിലും പ്രത്യേക വിഭാഗത്തെയോ മതത്തെയോ ലക്ഷ്യമിട്ടല്ല ഈ നിയമമെന്നും ആഭ്യന്തര മന്ത്രാലയം വ്യക്തമാക്കി.
