ഇന്ത്യയ്‌ക്കെതിരായ അഞ്ച് മത്സരങ്ങളുടെ ഏകദിന പരമ്പരയ്ക്ക് മുന്നോടിയായി ന്യൂസിലൻഡ് ക്രിക്കറ്റ് ടീമിന് തിരിച്ചടിയായി മുൻനിര താരങ്ങളുടെ പരിക്ക്. പരിക്കിനെ തുടർന്ന് ഓപ്പണർ രചിൻ രവീന്ദ്രയ്ക്കും മാർക്ക് ചാപ്‌മാനും പരമ്പര പൂർണ്ണമായും നഷ്ടമാകും. തോളെല്ലിന് പരിക്കേറ്റ രചിൻ രവീന്ദ്ര ഫീൽഡിംഗിന് പൂർണ്ണ സജ്ജനാകാത്തതിനാലും, ഹാംസ്ട്രിംഗ് പരിക്കിൽ നിന്ന് മുക്തനാകാൻ ചാപ്‌മാന് രണ്ടാഴ്ചത്തെ വിശ്രമം ആവശ്യമായതിനാലുമാണ് ഇരുവരെയും ഒഴിവാക്കാൻ ന്യൂസിലൻഡ് ക്രിക്കറ്റ് ബോർഡ് തീരുമാനിച്ചത്. ഈ മാസം അവസാനം നടക്കാനിരിക്കുന്ന ടെസ്റ്റ് പരമ്പര മുൻനിർത്തി മുൻകരുതൽ എന്ന നിലയിലാണ് രചിൻ രവീന്ദ്രയെ ഏകദിന പരമ്പരയിൽ നിന്ന് മാറ്റിനിർത്തുന്നതെന്ന് ഹെഡ് കോച്ച് റോബ് വാൾട്ടർ വ്യക്തമാക്കി. ഓക്ക്‌ലൻഡിലെ ഈഡൻ പാർക്കിൽ ബുധനാഴ്ച ആരംഭിക്കുന്ന പരമ്പരയിലെ തുടർന്നുള്ള മത്സരങ്ങൾ വെല്ലിംഗ്ടൺ, ഹാമിൽട്ടൺ, തൗരംഗ എന്നിവിടങ്ങളിലാണ് ക്രമീകരിച്ചിരിക്കുന്നത്. നേരത്തെ നടന്ന ടി20 പരമ്പര 3-2 ന് സ്വന്തമാക്കിയതിൻ്റെ ആത്മവിശ്വാസത്തിലാണ് ഇന്ത്യൻ സംഘം ഏകദിന പോരാട്ടത്തിനിറങ്ങുന്നത്.
താരങ്ങൾക്ക് പരിക്കേറ്റ സാഹചര്യത്തിൽ ന്യൂസിലൻഡ് ടീമിൽ ബോർഡ് മാറ്റങ്ങൾ വരുത്തിയിട്ടുണ്ട്. അവസാന രണ്ട് മത്സരങ്ങളിലേക്ക് മാത്രം തിരഞ്ഞെടുത്തിരുന്ന ടിം സീഫെർട്ടിനെ മുഴുവൻ മത്സരങ്ങളിലും ഉൾപ്പെടുത്തിയപ്പോൾ, ഫോർഡ് ട്രോഫിയിലെ മികച്ച പ്രകടനത്തിന്റെ കരുത്തിൽ ഹെൻറി നിക്കോൾസിനെ ആദ്യ മൂന്ന് മത്സരങ്ങൾക്കുള്ള ടീമിലേക്ക് തിരിച്ചുവിളിച്ചു. അവസാന രണ്ട് മത്സരങ്ങൾക്കായി ഡീൻ ഫോക്സ്ക്രോഫ്റ്റിനെയും ടീമിൽ ഉൾപ്പെടുത്തിയിട്ടുണ്ട്. പരിക്കിന്റെ പിടിയിലുള്ള പേസ് ബൗളർ മാറ്റ് ഹെൻറിയുടെ ഫിറ്റ്നസ് പരിശോധിച്ച ശേഷമായിരിക്കും കളിക്കുന്ന കാര്യത്തിൽ തീരുമാനമെടുക്കുക. ബോളിംഗ് കരുത്ത് കൂട്ടാനായി മാറ്റ് ഫിഷറും മുഴുവൻ പരമ്പരയിലും ടീമിനൊപ്പം തുടരും. മിച്ച് സാന്റനർ നയിക്കുന്ന ടീമിൽ ആദ്യ മൂന്ന് മത്സരങ്ങൾക്കായി മൈക്കൽ ബ്രേസ്‌വെൽ, ഡെവോൺ കോൺവേ, ജേക്കബ് ഡഫി, കൈൽ ജാമിസൺ, ടോം ലാഥം, ഡാരിൽ മിച്ചൽ, ഗ്ലെൻ ഫിലിപ്സ്, നാഥൻ സ്മിത്ത്, വിൽ യംഗ്, ബ്ലെയർ ടിക്നർ എന്നിവരും, അവസാന രണ്ട് മത്സരങ്ങളിൽ ഫിൻ അല്ലെൻ, ക്രിസ്റ്റ്യൻ ക്ലാർക്ക്, ലോക്കി ഫെർഗൂസൺ, മിച്ച് ഹേ, നിക്ക് കെല്ലി എന്നിവരും അണിനിരക്കും.
