ഇത്തവണത്തെ ഓണക്കാലം കേരളത്തിലെ തിയേറ്ററുകളിൽ വൻ ദൃശ്യവിരുന്നാകുമെന്ന് ഉറപ്പായിക്കഴിഞ്ഞു. പ്രേക്ഷകർ ആകാംക്ഷയോടെ കാത്തിരിക്കുന്ന ഒരുപിടി വമ്പൻ ചിത്രങ്ങളാണ് ബോക്സ് ഓഫീസിൽ മാറ്റുരയ്ക്കാൻ ഒരുങ്ങുന്നത്. മലയാള സിനിമയിലെ മുൻനിര യുവതാരങ്ങളുടെ ചിത്രങ്ങൾ ഒരേസമയം തിയേറ്ററുകളിലെത്തുന്നതോടെ ഇത്തവണത്തെ ഓണം കടുത്തൊരു സിനിമാ യുദ്ധത്തിന് കൂടിയാകും സാക്ഷ്യം വഹിക്കുക. ദുൽഖർ സൽമാൻ നായകനാകുന്ന ‘ഐ ആം ഗെയിം’, പൃഥ്വിരാജിന്റെ ബിഗ് ബജറ്റ് ചിത്രം ‘ഖലീഫ’, നിവിൻ പോളിയുടെ ‘ബെത്‌ലേഹം കുടുംബ യൂണിറ്റ്’ എന്നിവയാണ് ഈ ഉത്സവസീസണിൽ തിയേറ്ററുകളിലെത്തുന്ന പ്രധാന മലയാള ചിത്രങ്ങൾ. എന്നാൽ ഈ പോരാട്ടം മലയാളത്തിൽ മാത്രം ഒതുങ്ങുന്നില്ല; സൂര്യയും മമിത ബൈജുവും ഒന്നിക്കുന്ന ‘വിശ്വനാഥൻ ആൻഡ് സൺസ്’, കെ.ജി.എഫിന് ശേഷം യഷ് നായകനാകുന്ന ഗീതു മോഹൻദാസ് ചിത്രം ‘ടോക്‌സിക്’ എന്നീ വമ്പൻ തെന്നിന്ത്യൻ സിനിമകളും ഇതേസമയത്ത് തിയേറ്ററുകളിലെത്തുന്നുണ്ട്.എല്ലാ ചിത്രങ്ങളും കാണാനുള്ള ആവേശത്തിലാണ് സിനിമാപ്രേമികളെങ്കിലും, ഈ കടുത്ത മത്സരത്തിനൊടുവിൽ ആരാകും ഇത്തവണത്തെ ഓണം വിന്നർ എന്നറിയാനുള്ള കൗതുകത്തിലാണ് സിനിമാ ലോകം. ഇതിനിടെ, കഴിഞ്ഞ ദിവസം നടന്ന തന്റെ പുതിയ ചിത്രം ‘ഐ നോബഡി’യുടെ പ്രസ് മീറ്റിൽ വെച്ച് പൃഥ്വിരാജിനോട് ഈ ഓണം ക്ലാഷിനെക്കുറിച്ച് മാധ്യമപ്രവർത്തകർ ചോദിക്കുകയുണ്ടായി. പ്രേക്ഷകർ വലിയ ആഘോഷമാക്കാൻ പോകുന്ന ഈ ബോക്സ് ഓഫീസ് മത്സരത്തെ എങ്ങനെ കാണുന്നു എന്ന ചോദ്യത്തിന് ഏറെ രസകരമായ രീതിയിലായിരുന്നു പൃഥ്വിരാജ് മറുപടി നൽകിയത്. തങ്ങളുടെ പ്രിയതാരങ്ങളുടെ തീപാറുന്ന പോരാട്ടം തിയേറ്ററുകളിൽ നേരിട്ട് കാണാൻ കാത്തിരിക്കുകയാണ് ആരാധകർ.
