കൊച്ചി നഗരത്തിലെയും സമീപ പ്രദേശങ്ങളിലെയും കുടിവെള്ള വിതരണം പൂർണ്ണമായും സാധാരണ നിലയിലാക്കിക്കൊണ്ട് തൃക്കാക്കര പൈപ്പ്‌ലൈൻ ജങ്ഷനിലെ പ്രധാന പൈപ്പ്‌ലൈൻ തകരാർ കേരള വാട്ടർ അതോറിറ്റിയും (KWA) സൂയെസ് പ്രൊജക്ട്‌സ് ലിമിറ്റഡും ചേർന്ന് അടിയന്തരമായി പരിഹരിച്ചു. ആലുവ ശുദ്ധീകരണ ശാലയിൽ നിന്നും പെരുമാനൂർ വരെയുള്ള പ്രദേശങ്ങളിലേക്ക് വലിയ അളവിൽ കുടിവെള്ളം എത്തിക്കുന്ന 900 എം.എം. വ്യാസമുള്ള പ്രധാന പൈപ്പ്‌ലൈനിലാണ് പെട്ടെന്ന് വലിയ രീതിയിലുള്ള തകരാർ പ്രത്യക്ഷപ്പെട്ടത്. ഇതിനെ തുടർന്ന് കൊച്ചി കോർപ്പറേഷൻ പരിധിയിലെയും തൃക്കാക്കര ഉൾപ്പെടെയുള്ള സമീപപ്രദേശങ്ങളിലെയും ആയിരക്കണക്കിന് ഉപഭോക്താക്കൾക്കുള്ള ജലവിതരണം തടസ്സപ്പെടുകയും ജനജീവിതം ദുരിതത്തിലാവുകയും ചെയ്തിരുന്നു.
പൈപ്പ്‌ലൈൻ തകരാറിലായ വിവരം ശ്രദ്ധയിൽപ്പെട്ട ഉടൻ തന്നെ പരിപാലന ചുമതലയുള്ള സൂയെസ് പ്രൊജക്ട്‌സ് ലിമിറ്റഡിന്റെ സാങ്കേതിക വിദഗ്ദ്ധരും വാട്ടർ അതോറിറ്റി ഉദ്യോഗസ്ഥരും സ്ഥലത്തെത്തി സംയുക്ത പരിശോധന നടത്തി. സ്ഥിതിഗതികളുടെ ഗൗരവം കണക്കിലെടുത്ത് അടിയന്തരമായി അറ്റകുറ്റപ്പണികൾ പൂർത്തിയാക്കുന്നതിനായി പ്രത്യേക വിദഗ്ദ്ധ സംഘത്തെയും തൊഴിലാളികളെയും സ്ഥലത്ത് നിയോഗിച്ചു. പൈപ്പ്‌ലൈനിലെ ഉയർന്ന മർദ്ദവും ഭൂഗർഭ തടസ്സങ്ങളും പണി ദുഷ്കരമാക്കിയെങ്കിലും പ്രദേശവാസികളുടെ ബുദ്ധിമുട്ടുകൾ പരമാവധി കുറയ്ക്കുന്നതിനായി രാപ്പകൽ ഭേദമില്ലാതെ തുടർച്ചയായി യുദ്ധകാലാടിസ്ഥാനത്തിൽ ജോലികൾ ഏകോപിപ്പിച്ചു.
സൂയെസിന്റെയും വാട്ടർ അതോറിറ്റിയുടെയും ദ്രുതഗതിയിലുള്ള സംയുക്ത ഇടപെടൽ കാരണം കേവലം ഒരു ദിവസത്തിനുള്ളിൽ തന്നെ 900 എം.എം. പൈപ്പിന്റെ കൂറ്റൻ അറ്റകുറ്റപ്പണികൾ വിജയകരമായി പൂർത്തിയാക്കാൻ സാധിച്ചു. ജീവനക്കാരുടെ സമയബന്ധിതമായ പ്രവർത്തനം വഴി ലക്ഷക്കണക്കിന് ലിറ്റർ കുടിവെള്ളം പാഴായിപ്പോകുന്നത് തടയാനും, പ്രധാന റോഡിലുണ്ടായേക്കാമായിരുന്ന വലിയ രീതിയിലുള്ള അപകടസാധ്യതകളും ഗതാഗത തടസ്സങ്ങളും ഒഴിവാക്കാനും സാധിച്ചു. അടിയന്തര ഘട്ടങ്ങളിൽ അത്യാധുനിക സാങ്കേതികവിദ്യയും ഏകോപനവും ഉപയോഗിച്ച് വേഗത്തിൽ പ്രശ്നങ്ങൾ പരിഹരിക്കാനും പൊതുജനങ്ങൾക്ക് സുരക്ഷിതവും തടസ്സമില്ലാത്തതുമായ കുടിവെള്ള വിതരണം ഉറപ്പാക്കാനുമുള്ള തങ്ങളുടെ പ്രതിബദ്ധതയാണ് ഈ ദൗത്യത്തിലൂടെ കെ.ഡബ്ല്യു.എയും സൂയെസും തെളിയിച്ചിരിക്കുന്നത്.
