കാലവർഷത്തിന്റെ ദുർബലാവസ്ഥയും എൽ നിനോ സ്വാധീനവും കാരണം സംസ്ഥാനത്ത് ഇന്നും നാളെയും താപനില സാധാരണയേക്കാൾ മൂന്ന് മുതൽ നാല് ഡിഗ്രി സെൽഷ്യസ് വരെ ഉയരാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. ഉയർന്ന ചൂട് സൂര്യാഘാതം, നിർജലീകരണം തുടങ്ങിയ ഗുരുതര ആരോഗ്യപ്രശ്നങ്ങൾ ഉണ്ടാക്കുമെന്നതിനാൽ പകൽ 11 മുതൽ വൈകിട്ട് മൂന്ന് വരെ നേരിട്ട് വെയിലേൽക്കുന്നത് ഒഴിവാക്കണമെന്ന് സംസ്ഥാന ദുരന്തനിവാരണ അതോറിറ്റി നിർദേശിച്ചിട്ടുണ്ട്. ദാഹമില്ലെങ്കിലും വായുസഞ്ചാരമുള്ള അന്തരീക്ഷത്തിൽ വിശ്രമിക്കുന്നതിനൊപ്പം ധാരാളം ശുദ്ധജലം, ഒ.ആർ.എസ് ലായനി, സംഭാരം എന്നിവ കുടിക്കണമെന്നും മദ്യം, ചായ, കാപ്പി, കാർബണേറ്റഡ് പാനീയങ്ങൾ എന്നിവ ഒഴിവാക്കണമെന്നും മുന്നറിയിപ്പിലുണ്ട്. അയഞ്ഞ ഇളം നിറത്തിലുള്ള കോട്ടൺ വസ്ത്രങ്ങൾ, പാദരക്ഷകൾ, കുട അല്ലെങ്കിൽ തൊപ്പി എന്നിവ ഉപയോഗിക്കുന്നതാണ് അനുയോജ്യം.
വിദ്യാർത്ഥികൾ, കിടപ്പുരോഗികൾ, ഗർഭിണികൾ, പ്രായമായവർ, ഓൺ ലൈൻ ഡെലിവറി തൊഴിലാളികൾ, മാധ്യമപ്രവർത്തകർ, പുറംജോലികളിൽ ഏർപ്പെടുന്നവർ എന്നിവരുടെ കാര്യത്തിൽ പ്രത്യേക സുരക്ഷാ മുൻകരുതലുകൾ വേണമെന്ന് നിർദേശമുണ്ട്. സ്കൂളുകളിൽ കൂടുതൽ വെയിലേൽക്കുന്ന പരിപാടികൾ ഒഴിവാക്കാനും ഉച്ചസമയത്ത് തുറസ്സായ സ്ഥലങ്ങളിൽ പൊതുപരിപാടികളും ജോലി സമയങ്ങളും ക്രമീകരിക്കാനും ആവശ്യപ്പെട്ടിട്ടുണ്ട്. അതോടൊപ്പം കാട്ടുതീ വ്യാപനം, ചന്തകളിലും മാലിന്യ നിക്ഷേപ കേന്ദ്രങ്ങളിലും ഉണ്ടാകാൻ സാധ്യതയുള്ള തീപിടിത്തങ്ങൾ എന്നിവ തടയാൻ വനംവകുപ്പിന്റെയും ഫയർ ഓഡിറ്റിന്റെയും സുരക്ഷാ മാനദണ്ഡങ്ങൾ പാലിക്കേണ്ടതുണ്ട്. നിർജലീകരണം തടയാൻ എപ്പോഴും കുടിവെള്ളം കയ്യിൽ കരുതണമെന്നും അസ്വസ്ഥതകൾ ഉണ്ടായാൽ ഉടൻ വൈദ്യസഹായം തേടണമെന്നും അതോറിറ്റി വ്യക്തമാക്കി.
