പ്രതിപക്ഷ നേതാവ് പിണറായി വിജയന്റെ വസതിയിൽ റെയ്ഡിനെത്തിയ ഇ.ഡി ഉദ്യോഗസ്ഥരെ ആക്രമിച്ച കേസിൽ അന്വേഷണം കൂടുതൽ ഊർജ്ജിതമാക്കുന്നതിന്റെ ഭാഗമായി പ്രത്യേക അന്വേഷണ സംഘം വിപുലീകരിച്ചു. കേസിന്റെ ഗൗരവവും ഗൂഢാലോചനാ സാധ്യതയും മുൻനിർത്തി കൂടുതൽ എസ്.ഐമാരെയും സി.പി.ഒമാരെയും ഉൾപ്പെടുത്തിയാണ് പുതിയ അന്വേഷണ സംഘത്തിന് രൂപം നൽകിയിരിക്കുന്നത്. ആക്രമണത്തിന് പിന്നിലെ ആസൂത്രിത ഇടപെടലുകളും ഗൂഢാലോചനയും പുറത്തുകൊണ്ടുവരുന്നതിനായി ഉന്നത സി.പി.എം നേതാക്കളെ ചോദ്യം ചെയ്യാനാണ് അന്വേഷണ സംഘത്തിന്റെ തീരുമാനം.
സി.പി.എം സംസ്ഥാന സെക്രട്ടറി എം.വി ഗോവിന്ദൻ, തിരുവനന്തപുരം ജില്ലാ സെക്രട്ടറി വി. ജോയി, മുൻ മന്ത്രി വി. ശിവൻകുട്ടി എന്നിവർക്ക് അടുത്ത ആഴ്ച തന്നെ ചോദ്യം ചെയ്യലിന് ഹാജരാകാൻ നോട്ടീസ് നൽകും. ഉദ്യോഗസ്ഥർക്ക് നേരെയുണ്ടായ ആക്രമണത്തിന് പിന്നിലെ പ്രേരണയും ആസൂത്രണവും കണ്ടെത്താൻ നേതാക്കളുടെ ഫോൺ കോളുകൾ കേന്ദ്രീകരിച്ച് നടത്തുന്ന സൈബർ ഫോറൻസിക് പരിശോധനാ ഫലങ്ങൾ കേസിൽ നിർണ്ണായകമാകും. സംഭവ സമയത്തും അതിന് തൊട്ടുമുമ്പും നടന്ന ആശയവിനിമയങ്ങളെക്കുറിച്ച് വിശദമായി പരിശോധിച്ചുവരികയാണെന്ന് അന്വേഷണ ഉദ്യോഗസ്ഥർ വ്യക്തമാക്കിയിട്ടുണ്ട്.
