KSU നേതാക്കൾക്ക് കൂടിക്കാഴ്ചയ്ക്ക് അനുമതി നിഷേധിച്ചെന്ന വാർത്തകൾ തള്ളി മുഖ്യമന്ത്രി വി.ഡി. സതീശൻ. പ്രതിദിനം ആയിരക്കണക്കിന് ആളുകളെ കാണാറുണ്ടെന്നും ആർക്കും അനുമതി നിഷേധിച്ചിട്ടില്ലെന്നും അദ്ദേഹം വ്യക്തമാക്കി. തേവര കോളേജിൽ വെച്ച് തിരക്ക് കാരണം അലോഷ്യസിനെ ശ്രദ്ധിക്കാൻ കഴിഞ്ഞിരുന്നില്ലെന്നും എന്നാൽ ഇതിന് പിന്നാലെ അപവാദപ്രചാരണങ്ങൾ ഉയർന്നുവെന്നും അദ്ദേഹം ചൂണ്ടിക്കാട്ടി. അന്ന് രാവിലെ എറണാകുളം ഗസ്റ്റ് ഹൗസിൽ താൻ ലഭ്യമായിരുന്നുവെന്നും മാധ്യമങ്ങൾ തെറ്റായ വാർത്തകൾ നൽകരുതെന്നും മുഖ്യമന്ത്രി അഭ്യർത്ഥിച്ചു. സംസ്ഥാനത്തിന്റെ വികസനത്തിനായി ടാറ്റയുമായി നടത്തിയ ചർച്ചയിൽ മാരിടൈം മേഖലയിൽ 10,000 കോടി രൂപയുടെ നിക്ഷേപം എത്തിയ കാര്യം ചൂണ്ടിക്കാട്ടിയ അദ്ദേഹം, കേരളത്തിന്റെ ഭാവിയെക്കരുതി പോസിറ്റീവായ വാർത്തകൾ നൽകണമെന്നും മാധ്യമങ്ങളോട് ആവശ്യപ്പെട്ടു.
മന്ത്രിസഭാ യോഗ തീരുമാനങ്ങൾ വിശദീകരിക്കവേ, റാഗിങ്ങിനിരയായി മരിച്ച സിദ്ധാർത്ഥന്റെ പേരിൽ പുതിയ ആപ്ലിക്കേഷൻ പുറത്തിറക്കുമെന്നും മുഖ്യമന്ത്രി അറിയിച്ചു. റാഗിങ്ങിനെതിരെ കർശന നടപടികൾ ഉറപ്പാക്കുന്ന ഈ ആപ് വഴി വിദ്യാർത്ഥികൾക്ക് നേരിട്ട് പരാതികൾ നൽകാം. വഖഫ് ബോർഡ് പുനഃസംഘടനയെക്കുറിച്ചും സംസാരിച്ച മുഖ്യമന്ത്രി, പാർലമെന്റ് പാസാക്കിയ നിയമഭേദഗതിക്ക് ശേഷം വഖഫ് ബോർഡ് പുനഃസംഘടിപ്പിച്ച ആദ്യ സംസ്ഥാനം കേരളമാണെന്ന് പറഞ്ഞു. വഖഫ് ബോർഡിൽ അമുസ്ലിം പ്രതിനിധികളെ നിയമിക്കുമെന്ന നിലപാടിൽ മുൻ സർക്കാർ സുപ്രീം കോടതി വിധിയുടെ പശ്ചാത്തലത്തിൽ എത്തിയതാണെന്നും എന്നാൽ ഇതിനെതിരെ നിലവിലെ പ്രതിപക്ഷ നേതാവ് വർഗ്ഗീയ പ്രചരണം നടത്തുകയാണെന്നും അദ്ദേഹം വിമർശിച്ചു.
