കേരളത്തിന്റെ മുഖ്യമന്ത്രിയെ നിശ്ചയിക്കുന്ന കാര്യത്തിൽ അനിശ്ചിതത്വം തുടരുന്നതിനിടെ, എല്ലാ ചർച്ചകളും പൂർത്തിയായെന്നും ഹൈക്കമാൻഡ് തീരുമാനം വൈകാതെ ഉണ്ടാകുമെന്നും മുതിർന്ന കോൺഗ്രസ് നേതാവ് രമേശ് ചെന്നിത്തല വ്യക്തമാക്കി. കോൺഗ്രസ് നേതൃത്വം കൈക്കൊള്ളുന്ന ഏത് തീരുമാനവും പ്രവർത്തകർ ഒറ്റക്കെട്ടായി അംഗീകരിക്കുമെന്നും ഹൈക്കമാൻഡിനെ എല്ലാ കാര്യങ്ങളും ബോധിപ്പിച്ചിട്ടുണ്ടെന്നും അദ്ദേഹം ഡൽഹിയിൽ മാധ്യമങ്ങളോട് പറഞ്ഞു. എൽഡിഎഫ് സർക്കാർ രൂപീകരണത്തിന് എടുത്ത സമയവുമായി താരതമ്യം ചെയ്യുമ്പോൾ യുഡിഎഫിൽ കാലതാമസമില്ലെന്നും ജനാധിപത്യപരമായ ചർച്ചകളാണ് നടന്നതെന്നും അദ്ദേഹം കൂട്ടിച്ചേർത്തു. പ്രവർത്തകർ സമൂഹമാധ്യമങ്ങളിലൂടെയുള്ള ചേരിതിരിഞ്ഞുള്ള പോരുകളിൽ നിന്ന് വിട്ടുനിൽക്കണമെന്നും അദ്ദേഹം നിർദ്ദേശിച്ചു.
അതേസമയം, തിരഞ്ഞെടുപ്പ് ഫലം വന്ന് എട്ടു ദിവസം പിന്നിട്ടിട്ടും മുഖ്യമന്ത്രി പ്രഖ്യാപനം നീളുന്നതിൽ കേരളത്തിലെ കോൺഗ്രസ് നേതാക്കൾക്കും പ്രവർത്തകർക്കും ഇടയിൽ പ്രതിഷേധം ശക്തമാണ്. വി.ഡി. സതീശനായി മുസ്ലിം ലീഗ് നടത്തുന്ന സംഘടിത സമ്മർദ്ദമാണ് തീരുമാനത്തിന് തടസ്സമാകുന്നതെന്ന് കോൺഗ്രസിലെ ഒരു വിഭാഗം ആരോപിക്കുന്നുണ്ട്. കോൺഗ്രസിന്റെ ആഭ്യന്തര കാര്യങ്ങളിൽ ലീഗ് അമിതമായി ഇടപെടുന്നതിൽ ഹൈക്കമാൻഡിന് അതൃപ്തിയുണ്ടെങ്കിലും ഘടകകക്ഷികളെ പിണക്കാതെ പ്രശ്നം പരിഹരിക്കാനാണ് കേന്ദ്ര നേതൃത്വം ശ്രമിക്കുന്നത്. മുഖ്യമന്ത്രി സ്ഥാനത്തേക്ക് അവകാശവാദമുന്നയിക്കുന്ന പ്രമുഖ നേതാക്കളെ അനുനയിപ്പിക്കാനുള്ള ഫോർമുലകൾ തയ്യാറാക്കിവരികയാണ്. ഇന്നോ നാളെയോ ഡൽഹിയിൽ നിന്ന് ഔദ്യോഗിക പ്രഖ്യാപനം ഉണ്ടാകുമെന്ന പ്രതീക്ഷയിലാണ് കേരളത്തിലെ രാഷ്ട്രീയ കേന്ദ്രങ്ങൾ.
