ബോളിവുഡ് താരം ടൈഗർ ഷ്രോഫിന് നേരെയുണ്ടായ വെടിവെപ്പിന് പിന്നിൽ കൂടുതൽ ബോളിവുഡ് താരങ്ങൾക്കെതിരെയുള്ള ഗൂഢാലോചനയെന്ന് പോലീസ് കണ്ടെത്തൽ. ഷ്രോഫിന് പുറമെ നടൻ രൺബീർ കപൂറിനെയും പ്രതികൾ ലക്ഷ്യമിട്ടിരുന്നുവെന്നും, ഇതിന്റെ ഭാഗമായി ബാന്ദ്രയിലുള്ള രൺബീറിന്റെ വസതിക്ക് സമീപം അക്രമികൾ നിരീക്ഷണം നടത്തിയിരുന്നുവെന്നും വിവരങ്ങൾ പുറത്തുവന്നു. ബിഷ്ണോയ് സംഘത്തിലെ അംഗമായ അനിൽ പണ്ഡിറ്റിന്റെ നിർദേശപ്രകാരമാണ് ടൈഗർ ഷ്രോഫിന് നേരെ ആക്രമണം നടന്നതെന്ന് ബുധനാഴ്ച മുംബൈ പോലീസ് കോടതിയെ അറിയിച്ചു. കേസിൽ ഇതുവരെ എട്ടുപേരാണ് അറസ്റ്റിലായിരിക്കുന്നത്.
രാജസ്ഥാനിലെ കോട്ടയിൽ നിന്ന് കസ്റ്റഡിയിലെടുത്ത മൂന്ന് പ്രധാന പ്രതികളെ ബുധനാഴ്ച മുംബൈയിലെത്തിക്കുകയും ഒക്ടോബർ 31 വരെ പോലീസ് കസ്റ്റഡിയിൽ റിമാൻഡ് ചെയ്യുകയും ചെയ്തു. ഗൂഢാലോചനയുടെ ആഴവും ആയുധ വിതരണ ശൃംഖലയും അന്വേഷണ സംഘം വിശദമായി പരിശോധിച്ചുവരികയാണ്. നേരത്തെ സൽമാൻ ഖാന്റെ വസതിയായിരുന്നു പ്രതികൾ ലക്ഷ്യമിട്ടിരുന്നതെങ്കിലും, ശക്തമായ വൈ-പ്ലസ് സുരക്ഷയും 24 മണിക്കൂറും വിന്യസിച്ചിരിക്കുന്ന പോലീസ് കാവലും കാരണം ആ പദ്ധതി ഉപേക്ഷിക്കുകയായിരുന്നു. തുടർന്ന്, എല്ലാ ഞായറാഴ്ചയും സുരക്ഷ കുറഞ്ഞ ജുഹുവിലെ ഫുട്ബോൾ ഗ്രൗണ്ടിൽ എത്താറുള്ള ടൈഗർ ഷ്രോഫിനെ സംഘം ലക്ഷ്യമാക്കുകയായിരുന്നു.
