സ്പൈനൽ മസ്കുലർ അട്രോഫി (എസ്.എം.എ) ബാധിച്ച കുട്ടികൾക്കുള്ള മരുന്ന് മാറ്റവുമായി ബന്ധപ്പെട്ട വിവാദങ്ങൾക്കിടെ, നാറ്റ്കോ ഫാർമസ്യൂട്ടിക്കൽസ് പ്രതിനിധികളുമായി നടത്തപ്പെട്ട കൂടിക്കാഴ്ചയിൽ വിശദീകരണവുമായി ആരോഗ്യമന്ത്രി കെ. മുരളീധരൻ. കമ്പനിയുമായി പ്രത്യേക കൂടിക്കാഴ്ച നടത്തിയിട്ടില്ലെന്നും ദിനംപ്രതി നിരവധി ആളുകൾ ഓഫീസിലെത്താറുണ്ടെന്നും അത് സ്വാഭാവിക നടപടി മാത്രമാണെന്നും മന്ത്രി വ്യക്തമാക്കി. ഉൽപ്പാദകരും പ്രതിനിധികളും അവരുടെ വിവരങ്ങളും രേഖകളും പങ്കുവെക്കാറുണ്ടെങ്കിലും വിദഗ്ദ്ധരുമായി ചർച്ച ചെയ്യാതെ ആരോഗ്യവകുപ്പ് യാതൊരു തീരുമാനവും എടുക്കാറില്ലെന്ന് അദ്ദേഹം പറഞ്ഞു. പല സംസ്ഥാനങ്ങളിലും ഇതേ മരുന്ന് വിതരണം ചെയ്യുന്നുണ്ടെന്നും എല്ലാ കാര്യങ്ങളും മനസ്സിലാക്കാൻ താൻ ഡോക്ടറല്ലെന്നും മന്ത്രി കൂട്ടിച്ചേർത്തു.
മന്ത്രിയുടെ ഓഫീസിൽ വെച്ച് നാറ്റ്കോ പ്രതിനിധികളുമായി നടത്തിയ കൂടിക്കാഴ്ചയുടെ ദൃശ്യങ്ങൾ പുറത്തുവന്നതിന് പിന്നാലെയാണ് പ്രതികരണം. ഈ കൂടിക്കാഴ്ച സി.എസ്.ആർ (CSR) ഫണ്ടുമായി ബന്ധപ്പെട്ടുള്ളതാണെന്നാണ് ആരോഗ്യവകുപ്പ് നൽകുന്ന ഔദ്യോഗിക വിശദീകരണം. അതേസമയം, തൃശൂർ പൂരം കലക്കൽ വിവാദത്തിലെ അന്വേഷണ റിപ്പോർട്ടിനെക്കുറിച്ചും മന്ത്രി സംസാരിച്ചു. എം.ആർ. അജിത് കുമാറിനെ ആർക്കും രക്ഷിക്കാനാകില്ലെന്നും സംഭവത്തിന് പിന്നിലെ ഉൾക്കളികൾ തനിക്കറിയാമെന്നും വ്യക്തമാക്കിയ മന്ത്രി, റിപ്പോർട്ട് മന്ത്രിസഭയോ സർക്കാരോ വിശദമായി ചർച്ച ചെയ്ത ശേഷം തുടർതീരുമാനങ്ങൾ ഉണ്ടാകുമെന്നും അറിയിച്ചു.
