മുഖ്യമന്ത്രിക്കെതിരായ പരസ്യ വിമർശനത്തിൽ യു.ഡി.എഫ് കൺവീനർ അടൂർ പ്രകാശിനെ തള്ളി മുസ്ലിം ലീഗ് നേതൃത്വം രംഗത്തെത്തി. മുന്നണിയിൽ ചർച്ചകൾ കൃത്യമായി നടക്കുന്നുണ്ടെന്നും എം.കെ. മുനീറിന്റെ നിയമനം അടക്കമുള്ള എല്ലാ തീരുമാനങ്ങളും ഉഭയകക്ഷി ചർച്ചകളിലൂടെയാണ് കൈക്കൊണ്ടതെന്നും ലീഗ് അധ്യക്ഷൻ സാദിഖലി ശിഹാബ് തങ്ങളും മന്ത്രി പി.കെ. കുഞ്ഞാലിക്കുട്ടിയും വ്യക്തമാക്കി. മുസ്ലിം ലീഗിനുള്ളിൽ വലിയ രീതിയിലുള്ള ആഭ്യന്തര കലഹങ്ങളൊന്നുമില്ലെന്ന് സാദിഖലി തങ്ങൾ കൂട്ടിച്ചേർത്തു. ഇനിയും തീരുമാനങ്ങൾ വരാനുണ്ടെന്നും എല്ലാവരുടെയും പരാതികൾ പരിഹരിക്കപ്പെടുമെന്നും അറിയിച്ച കുഞ്ഞാലിക്കുട്ടി, മുന്നണിയിൽ അനൈക്യമില്ലെന്ന് ആവർത്തിച്ചു. തിരഞ്ഞെടുപ്പ് കമ്മീഷൻ വിഷയത്തിൽ രാജ്യം മുഴുവൻ ഒറ്റക്കെട്ടായി നിൽക്കുന്ന ഘട്ടത്തിൽ ഇത്തരമൊരു വിവാദം ഉണ്ടാകാൻ പാടില്ലായിരുന്നുവെന്നും പ്രധാന വിഷയത്തിന്റെ പ്രാധാന്യം കളയാൻ അനുവദിക്കരുതെന്നും അദ്ദേഹം ഓർമ്മിപ്പിച്ചു.
അതേസമയം, അടൂർ പ്രകാശ് അതൃപ്തി പരസ്യമാക്കിയതോടെ കോൺഗ്രസിനുള്ളിൽ നേതാക്കൾ തമ്മിലുള്ള വാക്പോര് രൂക്ഷമായിരിക്കുകയാണ്. അടൂർ പ്രകാശിനെ പരോക്ഷമായി പിന്തുണച്ച് സ്പീക്കർ തിരുവഞ്ചൂർ രാധാകൃഷ്ണനും കെ.പി.സി.സി ജനറൽ സെക്രട്ടറി ദീപ്തി മേരി വർഗീസും രംഗത്തെത്തിയപ്പോൾ, അദ്ദേഹത്തിന്റെ നിലപാടിനെ പൂർണ്ണമായും തള്ളിക്കൊണ്ടാണ് മന്ത്രി കെ. മുരളീധരൻ പ്രതികരിച്ചത്.
