ശബരിമലയിലും പമ്പയിലും അടിഞ്ഞുകൂടിയ മാലിന്യങ്ങൾ കാര്യക്ഷമമായി നീക്കം ചെയ്യുന്നതിനായി തിരുവിതാംകൂർ ദേവസ്വം ബോർഡും തദ്ദേശസ്വയംഭരണ വകുപ്പിന് കീഴിലുള്ള ക്ലീൻ കേരള കമ്പനിയും തമ്മിൽ ധാരണാപത്രം ഒപ്പുവെച്ചു. തിരുവനന്തപുരത്തെ ദേവസ്വം ബോർഡ് ആസ്ഥാനത്ത് പ്രസിഡന്റ് കെ. ജയകുമാറിന്റെ സാന്നിധ്യത്തിൽ നടന്ന ചടങ്ങിലാണ് കരാർ ഒപ്പിട്ടത്. ദേവസ്വം ബോർഡിന് വേണ്ടി ദേവസ്വം കമ്മീഷണർ ബി. സുനിൽകുമാറും ക്ലീൻ കേരള കമ്പനിക്ക് വേണ്ടി മാനേജിംഗ് ഡയറക്ടർ ജി.കെ. സുരേഷ് കുമാറുമാണ് ഒപ്പുവെച്ചത്. കരാർ യാഥാർത്ഥ്യമായതോടെ പ്രദേശത്തെ മാലിന്യങ്ങൾ നീക്കം ചെയ്യുന്നതിനുള്ള നടപടികൾ ഉടൻ തന്നെ ആരംഭിക്കും.
ഇതിന് പുറമേ, ശബരിമലയിലും പമ്പയിലുമുള്ള ഉപയോഗശൂന്യമായ ലോഹ വസ്തുക്കളും ലോഹ അവശിഷ്ടങ്ങളും നീക്കം ചെയ്യുന്നതിനുള്ള പ്രത്യേക ധാരണാപത്രത്തിൽ ഒക്ടോബർ അഞ്ചിന് ഒപ്പുവെക്കും. ലോഹാവശിഷ്ടങ്ങൾ ശേഖരിക്കാൻ ക്ലീൻ കേരള കമ്പനിക്ക് അനുമതി നൽകി സർക്കാർ ഉത്തരവ് പുറപ്പെടുവിച്ച പശ്ചാത്തലത്തിലാണ് ദേവസ്വം ബോർഡ് യോഗം ഈ കരാർ കമ്പനിക്ക് നൽകാൻ തീരുമാനിച്ചത്. തീർത്ഥാടന കേന്ദ്രങ്ങളിലെ ശുചിത്വം ഉറപ്പാക്കുന്നതിൽ ഈ പദ്ധതി നിർണ്ണായക പങ്ക് വഹിക്കും.
