യുവതാരം വൈഭവ് സൂര്യവംശിയുടെ കരിയറിനെ ബി.സി.സി.ഐ വളരെ ഗൗരവത്തോടെയാണ് നോക്കിക്കാണുന്നതെന്ന് സെക്രട്ടറി ദേവജിത് സൈകിയ വ്യക്തമാക്കി. പതിനഞ്ച് വയസ്സ് മാത്രം പ്രായമുള്ള കളിക്കാരന് അന്താരാഷ്ട്ര തലത്തിൽ കൂടുതൽ പരിചയസമ്പത്ത് നൽകാൻ ബി.സി.സി.ഐ ശ്രമിക്കുന്നത് അഭിമാനകരമായ കാര്യമാണ്. സൂര്യവംശിയാകട്ടെ മറ്റ് യുവതാരങ്ങളാകട്ടെ, സച്ചിൻ ടെണ്ടുൽക്കർ രാജ്യത്തിന് നൽകിയ സംഭാവനകളെ മാതൃകയാക്കണമെന്നും ഒരു ദിവസം കൊണ്ട് പ്രഭ മങ്ങുന്നവരാകാതെ ദൈർഘ്യമേറിയ കരിയർ ലക്ഷ്യമിടണമെന്നും അദ്ദേഹം ഓർമ്മിപ്പിച്ചു. വ്യാഴാഴ്ച മുംബൈയിലെ ബി.സി.സി.ഐ ആസ്ഥാനത്ത് ചേർന്ന അവലോകന യോഗത്തിൽ സൂര്യവംശിയുടെ കരിയർ രാജ്യത്തിന് ഉപകാരപ്പെടും വിധം ദീർഘകാലത്തേക്ക് പ്ലാൻ ചെയ്യുന്നത് സംബന്ധിച്ച് ഗൗരവമായ ചർച്ചകൾ നടന്നു. ബി.സി.സി.ഐ സെക്രട്ടറി ദേവജിത് സൈകിയയ്ക്ക് പുറമെ, ടെസ്റ്റ്-ഏകദിന ക്യാപ്റ്റൻ ശുഭ്മാൻ ഗിൽ, ട്വന്റി-20 ക്യാപ്റ്റൻ ശ്രേയസ് അയ്യർ, ഹെഡ് കോച്ച് ഗൗതം ഗംഭീർ, സെന്റർ ഓഫ് എക്സലൻസ് ഹെഡ് വി.വി.എസ് ലക്ഷ്മൺ തുടങ്ങിയ ഉന്നത ഉദ്യോഗസ്ഥർ യോഗത്തിൽ പങ്കെടുത്തു.
വെറും 15 വർഷവും 157 ദിവസവും മാത്രം പ്രായമുള്ള വൈഭവ് സൂര്യവംശി ഇതിനോടകം ഇന്ത്യൻ ക്രിക്കറ്റിലെ അപൂർവ്വ പ്രതിഭയായി മാറിയിട്ടുണ്ട്. ദുലീപ് ട്രോഫിയിൽ അർധസെഞ്ചുറി നേടുന്ന ഏറ്റവും പ്രായം കുറഞ്ഞ താരമെന്ന 57 വർഷം പഴക്കമുള്ള റെക്കോർഡ് തിരുത്തിയ വൈഭവ്, സിംബാബ്‌വെക്കെതിരായ പരമ്പരയിൽ 151 റൺസ് നേടി പ്ലെയർ ഓഫ് ദി സീരീസ് ആയിരുന്നു. ഇംഗ്ലണ്ടിനെതിരായ ട്വന്റി-20 അരങ്ങേറ്റത്തിലൂടെ അന്താരാഷ്ട്ര ക്രിക്കറ്റ് കളിക്കുന്ന ഏറ്റവും പ്രായം കുറഞ്ഞ ഇന്ത്യൻ താരമെന്ന റെക്കോർഡും സ്വന്തമാക്കി. 2026 ഐ.പി.എല്ലിൽ രാജസ്ഥാൻ റോയൽസിനായി ഒരു സെഞ്ചുറിയും അഞ്ച് അർധസെഞ്ചുറികളും അടക്കം 776 റൺസ് അടിച്ചുകൂട്ടിയ താരം ടൂർണമെന്റിലെ ടോപ് സ്കോററാവുകയും 72 സിക്സറുകൾ നേടി റെക്കോർഡ് സൃഷ്ടിക്കുകയും ചെയ്തു. ഓറഞ്ച് ക്യാപ്പ്, മോസ്റ്റ് വാല്യുബിൾ പ്ലെയർ, എമർജിംഗ് പ്ലെയർ, സൂപ്പർ സ്ട്രൈക്കർ, സൂപ്പർ സിക്സസ് പുരസ്കാരങ്ങൾ വാരിക്കൂട്ടിയ വൈഭവ്, ഐ.സി.സി അണ്ടർ 19 ലോകകപ്പിൽ 439 റൺസോടെ പ്ലെയർ ഓഫ് ദി ടൂർണമെന്റായും തിരഞ്ഞെടുക്കപ്പെട്ടിരുന്നു.
