ശ്രീലങ്കയ്‌ക്കെതിരായ ഒന്നാം ടെസ്റ്റിനുള്ള ഇന്ത്യൻ പ്ലേയിങ് ഇലവനിൽ ധ്രുവ് ജൂറെലിന് പകരം സർഫറാസ് ഖാനെ ഉൾപ്പെടുത്തണമെന്ന് മുൻ ഇന്ത്യൻ താരം മുഹമ്മദ് കൈഫ്. ഗാലെയിലെ സ്പിൻ പിച്ചുകളിൽ സ്പിൻ ബോളിംഗിനെ മികച്ച രീതിയിൽ നേരിടാൻ മികവുള്ള സർഫറാസാണ് ഏറ്റവും അനുയോജ്യനെന്ന് കൈഫ് വ്യക്തമാക്കി. മുൻപ് ടീമിന്റെ ഭാഗമായിരുന്ന കളിക്കാരെ പിന്തുണയ്ക്കുന്ന ശൈലിയാണ് മാനേജ്‌മെന്റന്റേതെങ്കിൽ പരിക്കേറ്റ സായ് സുദർശന് പകരക്കാരനായി ടീമിലെത്തിയ സർഫറാസിനേക്കാൾ ജൂറെലിന് അവസരം ലഭിച്ചേക്കാം. എങ്കിലും തന്റെ വ്യക്തിപരമായ തിരഞ്ഞെടുപ്പിൽ സർഫറാസാണ് മുൻപന്തിയിലുള്ളതെന്നും, അഞ്ചാം നമ്പരിലോ ആറാം നമ്പരിലോ സർഫറാസ് കളിക്കണമെന്നും കൈഫ് ചൂണ്ടിക്കാട്ടി.
സ്വീപ്, റിവേഴ്സ് സ്വീപ് ഷോട്ടുകൾ കൃത്യമായി കളിക്കുന്ന സർഫറാസിന് സ്പിന്നിനെതിരെ മികച്ച റെക്കോർഡുണ്ടെന്നും, അവസാന ദിനങ്ങളിൽ പിച്ച് കടുപ്പമാകുമ്പോൾ സ്പിന്നർമാരെ ആക്രമിച്ചു കളിക്കുന്ന അവൻ ടീമിന് വലിയ കരുത്താകുമെന്നും അദ്ദേഹം കൂട്ടിച്ചേർത്തു. ശ്രീലങ്കൻ ക്രിക്കറ്റ് ഇലവനെതിരായ സന്നാഹ മത്സരത്തിൽ രണ്ട് ഇന്നിംഗ്സുകളിൽ നിന്നായി വെറും 18 റൺസ് മാത്രം നേടിയ ജൂറെലിന്റെ സമീപകാല ഫോം നിരാശാജനകമാണ്. 10 ടെസ്റ്റുകളിൽ നിന്ന് 34.14 ശരാശരിയിൽ 478 റൺസാണ് ജൂറെലിന്റെ സമ്പാദ്യം. എന്നാൽ 2024-ൽ അരങ്ങേറിയ സർഫറാസ് ഖാൻ കളിച്ച ആറ് ടെസ്റ്റുകളിൽ നിന്ന് 37.10 ശരാശരിയിൽ 371 റൺസ് നേടിയിട്ടുണ്ട്. ബെംഗളൂരുവിൽ ന്യൂസിലൻഡിനെതിരെ നേടിയ 150 റൺസ് ഉൾപ്പെടെ ഒരു സെഞ്ചുറിയും മൂന്ന് അർധസെഞ്ചുറികളും അവന്റെ അക്കൗണ്ടിലുണ്ട്. ഓഗസ്റ്റ് 15-ന് ഗാലെയിൽ ആരംഭിക്കുന്ന ആദ്യ ടെസ്റ്റിലെ മിഡിൽ ഓർഡർ സ്ഥാനത്തിനായി ഇരുതാരങ്ങളും തമ്മിൽ ശക്തമായ പോരാട്ടമാണ് നടക്കുന്നത്.
