കേന്ദ്ര സർക്കാരിനെയും പ്രധാനമന്ത്രി നരേന്ദ്ര മോദിയെയും കടുത്ത ഭാഷയിൽ വിമർശിച്ച് കോൺഗ്രസ് പാർലമെന്ററി പാർട്ടി ചെയർപേഴ്‌സൺ സോണിയ ഗാന്ധി. കൽക്കരിപ്പാടം അനുവദിച്ച കേസിൽ മുൻ പ്രധാനമന്ത്രി മൻമോഹൻ സിംഗിന് സുപ്രീം കോടതി പൂർണ ക്ലീൻ ചിറ്റ് നൽകിയ പശ്ചാത്തലത്തിൽ ഒരു പ്രമുഖ ഇംഗ്ലീഷ് പത്രത്തിലെഴുതിയ ലേഖനത്തിലൂടെയാണ് അവർ നിലപാട് വ്യക്തമാക്കിയത്. ഇ.ഡി, സി.ബി.ഐ തുടങ്ങിയ അന്വേഷണ ഏജൻസികളെ രാഷ്ട്രീയാവശ്യങ്ങൾക്കായി കേന്ദ്ര സർക്കാർ ദുരുപയോഗം ചെയ്യുകയാണെന്നും ആരോപണവിധേയരായ നേതാക്കൾ ബി.ജെ.പിയിൽ ചേരുമ്പോൾ കുറ്റമുക്തരാകുന്ന കാഴ്ചയാണ് കാണുന്നതെന്നും സോണിയ ആരോപിച്ചു. മൻമോഹൻ സിംഗിന്റെ സത്യസന്ധതയും ഉത്തരവാദിത്തബോധവും നരേന്ദ്ര മോദി സർക്കാരിന്റെ ഭരണരീതിക്ക് തികച്ചും വിപരീതമാണെന്നും ചരിത്രം അദ്ദേഹത്തെ എന്നും ബഹുമാനത്തോടെയും കരുണയോടെയും സ്മരിക്കുമെന്നും അവർ കുറിച്ചു.
മൻമോഹൻ സിംഗിനെതിരായ നീക്കങ്ങൾക്ക് പിന്നിൽ ആർ.എസ്.എസ് – ബി.ജെ.പി ഗൂഢാലോചനയാണെന്നും അന്നത്തെ വ്യക്തിപരമായ ആക്രമണങ്ങൾക്ക് മുന്നിൽ നിൽക്കാൻ മോദിയും ഉണ്ടായിരുന്നു എന്നത് യാദൃശ്ചികമല്ലെന്നും സോണിയ തുറന്നടിച്ചു. മൻമോഹൻ സിംഗിനെതിരായ സി.ബി.ഐയുടെ ക്ലോഷർ റിപ്പോർട്ട് തള്ളിയ വിചാരണക്കോടതി നടപടിയെ 2026 ജൂലൈ 29-ന് സുപ്രീം കോടതി രൂക്ഷമായി വിമർശിച്ചിരുന്നു. ഈ സുപ്രീം കോടതി വിധി പരാമർശിച്ച സോണിയ ഗാന്ധി, വിവരവകാശ നിയമം, ഭക്ഷ്യസുരക്ഷാ നിയമം തുടങ്ങിയ യു.പി.എ സർക്കാരിന്റെ നിർണായക ഭരണനേട്ടങ്ങളെയും ലേഖനത്തിലൂടെ ഉയർത്തിക്കാട്ടി.
