അമേരിക്കൻ ആക്രമണത്തിന് പിന്നാലെ ഗൾഫ് രാജ്യങ്ങളിൽ അതീവ ജാഗ്രത; മിസൈലുകളെ പ്രതിരോധിച്ച് കുവൈറ്റ്.

ഇറാനിൽ അമേരിക്ക നടത്തിയ ശക്തമായ വ്യോമാക്രമണത്തിന് പിന്നാലെ ഗൾഫ് മേഖലയിലാകെ കനത്ത യുദ്ധഭീതിയും പ്രതിരോധ ജാഗ്രതയും ഉടലെടുത്തിരിക്കുകയാണ്. ശത്രുരാജ്യങ്ങളിൽ നിന്നുള്ള മിസൈൽ, ഡ്രോൺ ആക്രമണങ്ങളെ തങ്ങളുടെ വ്യോമപ്രതിരോധ സംവിധാനം വിജയകരമായി പ്രതിരോധിക്കുകയാണെന്ന് കുവൈറ്റ് സൈന്യത്തിന്റെ ജനറൽ സ്റ്റാഫിനെ ഉദ്ധരിച്ച് അൽ ജസീറ റിപ്പോർട്ട് ചെയ്തു. കുവൈറ്റിൽ ജനങ്ങൾ കേൾക്കുന്ന വലിയ സ്ഫോടന ശബ്ദങ്ങൾ ഈ വ്യോമപ്രതിരോധ സംവിധാനത്തിന്റെ ഇടപെടലുകൾ കാരണമാണെന്ന് വ്യക്തമാക്കിയ സൈന്യം, രാജ്യത്തുടനീളം യുദ്ധമുന്നറിയിപ്പ് അലാറങ്ങൾ പ്രവർത്തിപ്പിച്ചതായി കുവൈറ്റ് വാർത്താ ഏജൻസിയായ കെയുഎൻഎ സ്ഥിരീകരിച്ചു. അയൽരാജ്യമായ ഖത്തറിലും ആഭ്യന്തര മന്ത്രാലയം കടുത്ത സുരക്ഷാ മുന്നറിയിപ്പ് പുറപ്പെടുവിച്ചിരുന്നു. ജനങ്ങൾ വീടുകളിൽ തന്നെ തുടരണമെന്നും ഗ്ലാസ് ജനലുകളിൽ നിന്ന് അകന്നുനിൽക്കണമെന്നും നിർദ്ദേശിച്ച ഖത്തർ, പിന്നീട് ഭീഷണി ഒഴിഞ്ഞതായി വിലയിരുത്തി ഈ മുന്നറിയിപ്പ് പിൻവലിക്കുകയും സാധാരണ ജീവിതത്തിലേക്ക് മടങ്ങാൻ ആവശ്യപ്പെടുകയും ചെയ്തു. ബഹ്റൈനിലും സമാനമായ രീതിയിൽ രാജ്യത്തിന്റെ വിവിധ ഭാഗങ്ങളിൽ വ്യോമാക്രമണ സൈറണുകൾ മുഴങ്ങുകയും, ശാന്തത പാലിച്ച് സുരക്ഷിത കേന്ദ്രങ്ങളിലേക്ക് മാറാൻ ആഭ്യന്തര മന്ത്രാലയം പൗരന്മാർക്ക് നിർദ്ദേശം നൽകുകയും ചെയ്തിട്ടുണ്ട്.

അമേരിക്ക ഇറാനെ ആക്രമിക്കുന്ന ഓരോ ഘട്ടത്തിലും തങ്ങൾക്കെതിരായ ആക്രമണങ്ങളുടെ ഉറവിടം ഗൾഫ് രാജ്യങ്ങളാണെന്ന് ആരോപിച്ച് ഇറാൻ കുവൈറ്റ്, ഖത്തർ, ബഹ്റൈൻ തുടങ്ങിയ രാജ്യങ്ങൾക്ക് നേരെ തിരിച്ചടി നടത്താറുണ്ട്. ഇതിനാൽ തന്നെ അമേരിക്കയുടെ ഏറ്റവും പുതിയ ആക്രമണത്തിന് പിന്നാലെ ഗൾഫ് രാജ്യങ്ങൾ അതീവ ജാഗ്രതയിലാണ് കഴിയുന്നത്. എന്നാൽ തങ്ങൾ ഈ യുദ്ധത്തിന്റെ ഭാഗമല്ലെന്ന നിലപാടിലാണ് ഗൾഫ് രാജ്യങ്ങളെങ്കിലും, നിലവിലെ സംഘർഷം മുഴുവൻ മേഖലയുടെയും സുരക്ഷയെ ബാധിക്കുമെന്ന കടുത്ത ആശങ്ക അവർ പങ്കുവെക്കുന്നു. ഇതിനിടെ, കഴിഞ്ഞ ഫെബ്രുവരി 28-ന് അമേരിക്കയും ഇസ്രായേലും സംയുക്തമായി നടത്തിയ ആക്രമണത്തിൽ അന്തരിച്ച പരമോന്നത നേതാവ് ആയത്തുള്ള അലി ഖമനയിയുടെ ടെഹ്റാനിലെ വസതിക്ക് സംഭവിച്ച കനത്ത നാശനഷ്ടങ്ങളുടെ വീഡിയോ ദൃശ്യങ്ങൾ ഇറാന്റെ ഔദ്യോഗിക മാധ്യമങ്ങൾ പുറത്തുവിട്ടു. ഖമനയിയുടെ സംസ്കാര ചടങ്ങുകൾ നടക്കാനിരിക്കുന്ന വേളയിലാണ് പ്രകോപനം സൃഷ്ടിക്കുന്ന ഈ ദൃശ്യങ്ങൾ ഇറാൻ പുറത്തുവിട്ടിരിക്കുന്നത്.

തങ്ങൾക്കെതിരെ നടക്കുന്ന വ്യോമാക്രമണങ്ങൾക്ക് ശക്തമായ തിരിച്ചടി കാത്തിരിക്കാൻ ഇറാൻ പാർലമെന്റിന്റെ ദേശീയ സുരക്ഷാ സമിതി വക്താവ് ഇബ്രാഹിം റെസായി അമേരിക്കയ്ക്ക് മുന്നറിയിപ്പ് നൽകി കഴിഞ്ഞു. അമേരിക്കയെ ഭയക്കരുതെന്നാണ് തങ്ങളുടെ പരമോന്നത നേതാവ് പഠിപ്പിച്ചിട്ടുള്ളതെന്നും, നിലവിലെ ആക്രമണങ്ങൾക്ക് കൃത്യമായ മറുപടി നൽകുമെന്നും അദ്ദേഹം എക്സിൽ കുറിച്ചു. നേരത്തെ, ബുധനാഴ്ച ഇറാന്റെ തന്ത്രപ്രധാന മേഖലകളിലെല്ലാം അമേരിക്ക കനത്ത വ്യോമാക്രമണം നടത്തിയിരുന്നു. ഹോർമുസ് കടലിടുക്കിന്റെ നിയന്ത്രണത്തിൽ പ്രധാന പങ്കുവഹിക്കുന്ന സിറികിലും, ബന്ദർ അബ്ബാസ്, ജാസ്‌ക്, അബു മൂസ ദ്വീപ്, കോണറാക്ക് എന്നിവിടങ്ങളിലും അതിശക്തമായ ബോംബാക്രമണമാണ് നടന്നത്. ചാബഹാർ തുറമുഖത്തിന്റെ അടിസ്ഥാന സൗകര്യങ്ങൾക്കും സൈനിക-സിവിലിയൻ കേന്ദ്രങ്ങൾക്കും നേരെയും യുഎസ് ആക്രമണം നടത്തി. ഇറാൻഷഹറിലെ വിമാനത്താവള സമുച്ചയത്തിൽ നടന്ന ആക്രമണത്തിൽ ഒരാൾ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തു. ഇറാന്റെ പ്രധാന ആണവ നിലയം സ്ഥിതി ചെയ്യുന്ന ബുഷെഹറിലും ശക്തമായ സ്ഫോടനങ്ങൾ ഉണ്ടായെങ്കിലും ആണവ നിലയത്തിന് യാതൊരുവിധ കേടുപാടുകളും സംഭവിച്ചിട്ടില്ലെന്ന് പ്രാദേശിക ഭരണകൂടം വ്യക്തമാക്കിയിട്ടുണ്ട്.